100 Sekunden Platt : To Pingsten is dat schöön

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Mit den Kindern in den Tierpark oder doch lieber zuhause im Garten bleiben, Pfingsten kann so schön sein, meint Marianne Ehlers.

shz.de von
07. Juni 2014, 06:30 Uhr

To Pingsten hett een sik in fröher Tieden smuck maakt, feine Tüüch antrocken – wenn dat Weder dorna weer, harrn de Kinner Kneestrümp un Sandalen an. Vadder kreeg de witte Büx ut’t Schapp – un Mudder versöch, sik in dat sieden Kleed vun verleden Johr rintowörgeln. Man de Winterpunnen seten ehr in oder beter op de Knaken.

Un denn güng dat los, meisttiet to Foot, mit Eten un Drinken dorbi. Keen sik dat leisten kunn, de kehr in en Gastweertschop in. Denn geev dat Kartüffelsalat un Knackwust, dat weer wat! Wolang hebbt wi dat Woort „Knackwust“ al nich mehr höört!

Gifft dat düsse Pingsttouren noch? Oder is sowat ut de Mood kamen? Vundaag, wo jedereen jümmerto op den Padd un ünnerwegens is? Doch, ik glööv, Öllern un Kinner gaht ümmer noch geern tosamen los, villicht in’n Wildpark, wo ja ok en Speelplatz dorbi is oder in en Swemmbad üm de Eck. Un to Pingsten hebbt ja all en poor Daag frie, dor kann een mal los. Mitünner maakt dat ja ok Spaaß, tohuus in’n Goorn in de Sünn to sitten un an’n Avend den Grill antosmieten.

Maak doch mal wedder so en schöne ooltmoodsch Pingsttour, to Foot oder mit Rad – du warrst sehn, dat maakt richtig Spaaß! Un wenn dat achterna denn Pizza un Döner gifft, maakt doch nix. De Tieden hebbt sik nu mal ännert.

Höör mal, de Iesmann pingelt buten in de Straat – jüst so as fröher. Schick de Kinner mal los, mit en beten Lüttgeld in de Hand. Villicht kriggts du ja ok en Kugel af.

Pingstgröten un Sünnschien vun

Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen