100 Sekunden Platt : Swatt-Root-Gollen Football!

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Was isst und trinkt der Fan zu Fußballzeiten – und was frisst der Kater? Marianne Ehlers beobachtet beide.

shz.de von
05. Juli 2014, 06:30 Uhr

Wenn Football an de Tour is, denn loopt de Klocken anners. Na kloor, nich jichenseen Football – nee, DE FOOTBALL-Weltmeesterschop. Un de is nu jüst an’t Lopen, un du schullst denken, de Lüüd sünd all en beten mall.

Na goot, Fahns an’t Auto oder ok an’t Huus, dor hebbt wi uns an wennt, dat mag ja noch angahn. Un ok mit dat Fan-T-Shirt mutt ween, anners kann een nich vör dat Puschenkino sitten un mitfevern.

Man den ganzen annern Kraam? Also, gah du mal in düsse Daag in en Supermarkt – dor sühst du blots noch swatt-root-gollen Tüdelüüt ... is dat Enn vun weg!


Egentlich will ik Tomaten un Salat, Broot un Kees inköpen, villicht ok noch en lütt Buddel Beer ... Man dorto mutt ik eerstmal vörbi an grote Papp-Opstellers mit Kartüffelchips, Eerdnööt, Schokoladenstangen un Lollys. De Lollys heet Chupa Chups un sünd meist so groot as de Kopp vun en Babypopp. Kannst lang an rümslickern, langt seker för en ganze Footballspeel. Du leve Tiet! Un allens is inpackt in swatt-root-gollen Papeer. Överall Düütschland, ok op de Beerdosen – ik kann dat nich faten!

Wat mi an'n mehrsten verbaast hett? De Football-Hysterie gellt ok al för de Deerten, hier meen ik jüst mal unsen Kater.

Dor gifft dat wat ganz Feins: „World Cup Dinner“ för Stuventigers. Is dat nich wunnerboor? De Kater lickt sik al üm den Boort. He hett al lang markt, dat sien Lüüd in’n Ogenblick en beten mall in’n Kopp sünd. Ik strakel em gau mal över den Kopp un verspreek em: „In en poor Daag is allens vörbi, denn hest du Roh för de nächsten veer Johr!“

Dankboor luert he na mi hooch. Man denn maakt he sik doch gau över dat lecker Football-Freten her. Beter is beter, ehr dat villicht in de Halvtiet noch een wat afhebben will. Kann ja angahn, dat de Chips ut de swatt-root-gollen Tüüt denn all sünd!

Bunte Football-Gröten vun

Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen