zur Navigation springen

100 Sekunden Platt : Snack di wat torecht

vom

In alten Schnacks und Sprüchen finden wir das ganze Leben. Marianne Ehlers hat ein paar besonders schöne gefunden.

shz.de von
erstellt am 25.Jan.2014 | 08:00 Uhr

Mi dünkt, dat is mal wedder Tiet för en poor Snacks – ut de Muuskist, versteiht sik, man mitünner sünd se jüst noch so frisch as in ole Tieden.

Wat heff ik nich allens funnen in en  Book vun 1988! Fang ik doch mal eenfach an: Umsünst is nich mal de Dood, de mutt een mit dat Leven betahlen. Oder: Ünner jede Fach wahnt ok en Ach. Dat kennt wi ok ut dat Hoochdüütsche. Jüst so as: Wokeen keen Verstand hett, de kann em ok nich verleren.

Ümmer steiht de Minsch vörn an, mit all sien Macken un sien goden un slechten Sieden. Höör mal to: Jeedeen Striet hett ümmer twee Sieden: de egen un en verkehrte. Oder: Dat Geven deit ümmer den Minschen sien Hart – sien Hand langt dat blots her.

Mit dat Füer hett de Minsch dat al ümmer hatt: Wokeen toveel Füer in’t Hart hett, den stiggt de Rook to Kopp. Wokeen in’t Füer rinpuust, den fleegt de Funken in de Ogen. Dorto höört denn ok: Dat Leven is as en Füer; dat fangt mit Rook an un nimmt sien Enn mit Asch.

Oha, man ehr dat wi nu trurig warrt, glieks noch wat Vergnöögtes achterna: Een mutt de Lüüd snacken laten, de Göös köönt dat nich! Solang as en Fru geern sööt blieven will, schull se nich soveel Sötes vertehren. Je mehr en Katt striegelt warrt, desto höger driggt se den Steert.

Un an’t Enn denn noch de richtige Wohrheit: Wat en Swienstrog is, dorut lett sik keen Vigelien maken. Dor kannst lang över spikeleren!

 

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen