zur Navigation springen

100 Sekunden Platt : Sleden föhren

vom

War das nicht schön mit dem alten Holzschlitten? Marianne Ehlers schwelgt in Erinnerungen.

shz.de von
erstellt am 08.Feb.2014 | 06:30 Uhr

Wat weer dat doch eenmal schöön, fröher – ja, domals, in uns Kinnertiet, as wi jümmers den helen Winter hendörch Snee harrn. Tominnst besinnt  wi uns vundaag so – un wi hebbt vergeten, dat männich Wintermaanden ok mal natt un rusig ween sünd.

Vundaag hebbt wi dat Geföhl vun den ewigen Kinnerwinter – un wat sünd wi in een Tour den Barg dalsuust! Den Sleden harrn wi, kloor doch, vun den Wiehnachtsmann kregen. Ut Holt weer de un stabil as man wat. Nich so’n olen Plastikschiet as de Kinner vundaag ünner ’n Achtersten hebbt! Un wi kunnen mit twee Mann op dat Dings sitten – de lüttst seet vörn, dat grötter Kind achtern. Wi kunnen de Tiet nich aftöven, bit wi na Wiehnachten uns niegen Sleden utproberen kunnen.

„Lütt Tirol“ – so hett de Koppel heten, de so en feinen Barg to’n Rünnersusen harr. Oh, wat hebbt wi en Spaaß hatt! Dor geev dat verscheden Bahns, lichten un sworen. Un ganz swoor weer de „Doodsbahn“, oha! Man keeneen vun uns is dor mal to Mallör kamen, man lang nich. Kloor, af un an is de Sleden mal mit uns ümkippt – un wi hebbt uns den Arm oder dat Been stött. Blaue Plackens geev dat bavento, man dat hett uns nich stöört.

Slimm weer dat, wenn de Sleden mal twei güng. Denn müss uns Vadder bi un repareren. Dat hett he denn ok daan, man mit veel Schimpen. Eenmal hett mien Broder sik överslagen mit sien Rennsleden, op de Doodsbahn. Un dat Modell weer in de Grütt. Dorna harr he keen Lust mehr. Un Vadder hett den tweien Sleden to Füerholt verarbeidt. Schaad egentlich. Geern wörr ik em noch mal anfaten, den olen Sleden.

Sledenfohr-Gröten vun Marianne Ehlers vun den Sleswig-Holsteenschen Heimatbund

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen