100 Sekunden Platt : Schokolaad un Brune Koken

Weihnachtskekse sind schon vor dem ersten Advend unwiderstehlich.
Foto:
Weihnachtskekse sind schon vor dem ersten Advend unwiderstehlich.

Kann man sich gegen die Versuchung der Advents-Süßigkeiten wehren? Das ist nicht so einfach, muss Marianne Ehlers feststellen.

shz.de von
23. November 2013, 06:30 Uhr

Ja, ik heff mi dor an wennt – dat mutt ik nu mal togeven. Fröher, ja fröher heff ik mi argert, wenn in'n September de ersten Leevkoken in de Regalen opdükern, wenn ik meist över de bunten Wiehnachtsmannen stöltern dee.

Maak mi allens nix mehr ut! Un dat is wohr. Ik kiek dor eenfach nich mehr hen.

Ik slieker mi an düsse bunten Wiehnachtsinseln in den Supermarkt vörbi, maak en groten Krink üm ehr rum – un gah hen na de frischen Saken. Ik bruuk Vitamine in düsse Tiet, denn ik will mi ja nich verköhlen.

Ik koop Salat un rode Wuddeln, Avocado un Bananen, ach ja – en poor Wiendruven nehm ik mi ok noch mit. Kartüffeln ut de Bio-Eck – un nu bün ik rundüm tofreden un heff allens, wat ik bruuk. Nix Ungesunnes is dorbi, richtig stolt bün ik op mi sülven. Mit Schangs heff ik de Punnen vun all de Gröönkohl-Eterie bit Wiehnachten wedder weg. Dat müss ik doch woll henkriegen.

Un Wiehnachten nehm ik allens wedder to – oha, ik seh dat al ankamen, dat dore Lieden. Dat smeckt aver ok allens so goot: de Schokolaad, de Brunen Koken, de Nööt – un dorto kümmt noch Rootkohl un Goosbraden, Kroketten un lecker Sooß.

Ik bün meist vertwiefelt. Worüm blots fallt mi dat allens nu jüst in, wo ik doch en Wagen vun gesunne Eten packt heff! Denn kunn ik ja egentlich … ik meen, ik mutt dat ja allens sülven weten … un överto, geiht doch keeneen wat an!

Tohuus kaak ik mi en Tass Kaffee un eet dorto söven, nee, acht Smoltnööt! Lecker!

(Un-)Gesunne Gröten vun Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen