zur Navigation springen

100 Sekunden Platt : Platt in de School

vom

Es tut sich viel in punkto Spracherwerb für Plattdeutsch in schleswig-holsteinischen Grundschulen, darüber freut sich Marianne Ehlers.

shz.de von
erstellt am 17.05.2014 | 06:00 Uhr

Kloor, dat is en ole Thema. De plattdüütsche Spraak is in Sleswig-Holsteen  al ümmer in de School vörkamen. Mal in’n Düütsch-ünnerricht, mal ok in anner Stünnen, mehrsttiets blots in de Grundschool un wenn dor en Lehrer oder Lehrerin mit Platt wat an’n Hoot harr. Mitünner wöör blots in de Wiehnachtstiet mal wat mit Platt maakt, en Gedicht butenkopps lehrt oder en lütt Theaterstück bi de Wiehnachtsfier opföhrt. De Leeswettstriet „Schölers leest Platt“ speelt en heel wichtig Rull siet 35 Johr.

Wat fehlt hett, weer sowat as en „Verbindlichkeit“. Een kunn Platt in de School mit Glück mitkriegen. Wenn nich, hett ok keeneen wat seggt.

 

Dat schall nu anners warrn. Af dat tokamen Schooljohr kriegt 27 Grundscholen in uns Land extra Stünnen, um de Kinner vun de eerste Klass bit hen na de veerte Klass de plattdüütsche Spraak richtig bitobringen. De Spraak warrt denn lehrt as en Frömdspraak. De Lehrers kriegt wat an de Hand, warrt ok wiederbillt – so sünd denn an’t Enn vun düsse veer Johr en Barg Kinner richtige Plattsnackers, ok wenn se de Spraak nich vun tohuus mitkregen hebbt.

Ja, ok wenn dat vele Lüüd ümmer noch nich glöövt: de plattdüütsche Spraak kann een lehren, so as Engelsch un Franzöösch un anner Spraken. Een mutt ehr nich mit de Moddermelk mitkregen hebben.

Dat is sogor veel eenfacher, Platt to lehren – denn dat Halve köönt de mehrsten al, dat Verstahn. In’n Gegendeel vun en frömde Spraak is Platt so dicht bi Hoochdüütsch, dat Lütt un Groot ehr hier in’n Noorden meisttiets verstahn köönt. Fehlt blots noch dat Snacken – un laterhen villicht ok mal en beten wat lesen un schrieven.

Un so is dat ole Thema Platt nu mit eenmal en niege Thema mit ganz veel Kiek na vörn – un dat is doch wunnerboor!

Gröten vun de plattdüütsch Schoolbank seggt

Marianne Ehlers vun den Sleswig-Holsteenschen Heimatbund

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen