100 Sekunden Platt : Moin, ik heet Hein

Marianne Ehlers liest jede Woche eine plattdeutsche Geschichte auf shz.de
Marianne Ehlers liest jede Woche eine plattdeutsche Geschichte auf shz.de

Welch große Hilfe beim frühen Plattdeutsch-Lernen Sprachpuppen sein können, lässt Marianne Ehlers den netten Hein selbst erzählen.

Avatar_shz von
02. November 2013, 06:30 Uhr

Ik will em geern mal vörstellen, düssen düchtigen Hölper bi’t Sprakenlehren in Kinnergoorn un School. Süh, dor sitt he! Luster mal to:

Mien Naam is Hein – enfach blots Hein. Nix dorvör un nix dorachter. Ik bün de plattdüütsche Chef in Kinnergoorn un School, denn dat geiht ümmer na mien Nees. Wenn ik dor bün, denn snackt all Platt. Dat is doch nett, oder? Ik heff ja en Problem: ik kann blots een Spraak, un dat is Plattdüütsch. Keen Hoochdüütsch un ok nix Anners. Wo dat angahn kann? Nu, ik bün ja man blots en Figur, en Hölper bi’t Sprakenlehren. Mi glöövt all, dat ik blots Platt kann, un denn strengt sik all düchtig an mit Snacken. De Lütten, man ok de Groten. Wenn mien Mackers, de Lüüd in Kinnergoorn un School, blots Platt mit de Kinner snackt, denn glöövt se ehr dat nich. Se hebbt nämlich höört, dat de all ok Hoochdüütsch snacken köönt. De laat sik nich ansmeren, man jo nich! De sünd klook! Man ik smeer ehr nich an, ik kann ja man blots düsse ene schöne Spraak.

Vun mi gifft dat keen Bild. Ik seh ümmer anners ut: mal kaam ik as Seemann mit Mütz op, mal bün ik Goorner, mal Schandarm. Ik heff ok nette Kollegschen, een heet Lotta, dat is mien Enkeldochter. De kann ok blots Platt.

Süh, un nu gaht wi mal all tosamen op de plattdüütsche Reis. Emma, de Mööv, mien beste Fründin, is mit dorbi. Wi wünscht jem ganz veel Spaaß mit uns beiden!

So, dat is mien lütten Fründ Hein – un wokeen mehr över em weten will, de kann sik geern mal bi mi mellen!

Gröten vun Hein mit de Mütz un vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen


Nachrichtenticker