zur Navigation springen

100 Sekunden Platt : Mien Kalenner

vom

Der neue Kalender enthält schon jede Menge Termine für 2014 – und doch freut Marianne Ehlers sich auf das neue Jahr.

shz.de von
erstellt am 04.Jan.2014 | 08:00 Uhr

Mien Kalenner för 2014 gefallt mi nu al so richtig goot, keen Wunner! He is gröön un schöön, hett vörn en smucken Boom op – un ik kann em fein in de Tasch steken.


Nu will ik em op Schick bringen – de Geboortdagen indregen un sowat. Dorbi fallt mi op: he ist gornich mehr so frisch un nie! Keen Wunner, ik heff em ja ok al siet dree Maanden tosamen mit mien Kalenner 2013 in de Tasch. War dor al an Terminen binnensteiht, ik glööv dat ja woll nich! Dorbi wull ik doch düt Johr mal en beten weniger annehmen, mi twüschendörch ok mal verpusten. Dat warrt ja wedder mal nix. Egaal, ik bün dor ja sülven mit bi – un egens maakt mien Arbeit för Plattdüütsch mi ja ok veel Spaaß.

Kiek, dor is noch en ganzen Stoot an Daag, wo nix steiht. Schull ik an düsse Steed villicht mal mien Urlaub inplanen? Dat weer doch en gode Idee. Ja, so maak ik dat! Wo ik hen will? Dat weet ik noch nich.

Ach, ik freu mi op düt Johr, bün heel neeschierig, wat so allens op mi tokamen warrt. Mien Kalenner – düt Johr heff ik een op Platt – de warrt dörch de Daag un Weken un Maanden bi mi ween. Nu süht he noch maneerlich ut, man an’t Enn vun’t Johr warrt he afgrepen ween un de Ecken sünd twei.

Kloor, ik kunn mi ja mit Smartphone mien Termine organiseren, sünst bün ik ja ok för de moderne Technik  - man bi mien Kalenner för de Tasch bün ik doch en beten ooltmoodsch. Ik mag geern ok so mal wat rinschrieven, wenn mi de een oder anner Satz so infallt un ik jüst keen Zeddel to Hannen heff. Oder ok mal en sms, de ik wohren will, oder en lütten Snack, den ik höört heff.

So, nu kann dat losgahn, verpuust heff ik mi över de Fierdaag, de Arbeit luert – un mienen Kalenner warr ik ok düt Johr vele Malen in de Hand nehmen.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen