100 Sekunden Platt : Mehlbüdel eten

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Marianne Ehlers verrät verschiedene Variationen dieses typisch schleswig-holsteinischen Essens.

shz.de von
29. März 2014, 06:30 Uhr

Uns gode ole sleswig-holsteensche Köök is doch ok vundaag noch richtig lecker! To'n Bispill de Mehlbüdel, wokeen kennt em nich? Dat is en söten Deeg, de in en Dook kaakt warrt. De Waterdamp schall em denn gor warrn laten. Dat Besünner is, dat rundüm den Deeg Speck dorbi is – un dat Söte un dat rökert Soltige tohoop – dat gifft denn den richtigen Smack. Dorto gifft dat denn en rode Sooß.

Dat is dat Grundrezept, wovun dat denn noch vele verscheden Varianten gifft. De rode Sooß kann geern Kirschen dor in hebben, geiht avers ok blots mit Saft.

De Mehlbüdel kann Rosinen hebben, denn is dat en bunten Mehlbüdel. Wenn he so richtig fein geel is, denn hett de Buersfru fröher de Biestmelk dorto nahmen. Wat dat is? Dat is de Melk vun en Koh, de jüst en Kalv kregen hett.

Wat is denn nu en swarten Mehlbüdel? Nu, de wörr fröher to de Tiet vun’t Slachten maakt – un wat geev de Farv? Kloor doch, dat frische Bloot vun dat Deert, dat jüst harr an glöven müsst. Oh nee, dat höört sik för mi un seker ok för vele anner Lüüd nich so apptietlich an. Kümmt glieks na Swartsuer.

Bi de Gillen fröher un vundaag ok noch gifft dat Swiensback un Kartüffeln un Semp dorto. Dor schallst du woll satt vun warrn! Un achterna kümmt denn de Kööm, denn dat höllt de beste Maag nich ut.

Is de Mehlbüdel nich in en Dook kaakt, sünnern in en Form mit en Schosteen in de Mitt, denn heet he „Groten Hans“ un smeckt ok wunnerbor. Allens anner dorto is jüst datsülvige.

Na denn, laat sik den Kraam mal smecken. Ik för mien Deel warr dat doon.

Gröten vun'n Disch Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen