100 Sekunden Platt : Martje Floris

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Wer kennt ihn nicht, den schönen alten Trinkspruch von Martje Floris? Marianne Ehlers erzählt die Geschichte dazu.

shz.de von
22. März 2014, 06:30 Uhr

In de verleden Week güng dat ja üm dat Drinken un de Sprööks dorto. Dor gifft dat ja vele ole Geschichten. Een dorvun speelt in ole Tieden op de Halfinsel Eiderstedt.

Dat weer to de Tiet vun den sweedschen Krieg, um 1700 – de Suldaten harrn ehr Lager in de Stadt Tönn (Tönning) opslagen un weren as dull an’t Brennen un Tweimaken. Een Dag nu kemen se op en groten Buernhoff un leten sik vun de Buersfru düchtig opdischen. Un an’t Enn güng dat los mit dat Supen. Een na den Annern bröch en Spröök ut – man denn keem een op de Idee, de junge Dochter vun den Buern to ropen. Se schull doch ok mal en Drinkspröök utbringen op de Gesundheit vun de Suldaten.

Dat weer Martje Floris, de al de ganze Tiet tokeken harr, wat de rugen Gesellen dor dreven. Nu hööl se ehr Glas in de Hööch un snack mit faste un fierlich Stimm:

„Dat gah uns wohl op unse olen Dage!“

Do hebbt se sik schaamt, de sweedschen Suldaten, un hebbt sik liesen torüchtrocken. Siet de Tiet gaht de Eiderstedter Lüüd nienich uteneen, ahn dat een dat Glas hoochböört un Martje Floris ehren Spröök seggen deit.

Gaht wi denn noch en beten wieder torüch, hen na de olen Germanen. Över Johrhunnerten hebbt de bi uns in’n Noorden dat Drinken op de Gesundheit öövt – un nich blots dat. Meisttiets weer dat en beten dull, wat dor aflööp. To’n Bispill hett een soveel Bekers drunken, as de Naam vun den Besöker Bookstaven harr. Weer jüst keen dor, denn hett de Mann eenfach de Naam vun siene Leevste nahmen. Ja, is denn dat to glöven! Un de Spröök dorto? Pass mal op:

„Drink ik en Wien, de is wat slecht, denn is mi Hans as Naam woll recht. Man is he goot, de Wien, un en Genuss, nööm ik mi Marc Antonius!“

Blifft blots noch en wienselig Gröten vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen