zur Navigation springen

100 Sekunden Platt : Maiklören

vom

Das schöne helle Grün ist die Farbe des Monats Mai, aber auch andere bunte Farben findet Marianne Ehlers in der Natur.

Wat is de Klöör vun den Maimaand? To allereerst mal dat Gröön. Dat springt uns an vun all de Sieden: gröön sünd de Wischen, de Büsch un de frischen Blääd an’n Boom, de Rasen in’n Goorn, dat Moos dortwüschen ok.

De nedderdüütsche Lyriker Peter Kuhweide hett en Gedicht schreven över hunnert Sorten gröön Gras – un de holsteensche Schrieversmann Johann Hinrich Fehrs schrifft in en Gedicht över dat Maigröön:

 

Maigröön bringst du mi,
Maigröön, Marie!
De Sommer kümmt ni fröh un laat,
kümmst du, so steiht de Welt in 'n Staat,
de Swolken kaamt, de Wolken gaht,
in Sünnschien lacht mi Goorn un Kaat –
Maigröön bringst du mi,
Maigröön, Marie!

 

Maigröön bringst du mi,
Maigröön, Marie!
O Deern, nu is 't ni lang mehr hin,
denn büst du mien, denn treckst du in
mit Kroon un Kranz as Königin –
Is noch so 'n glücklich Huus to finn‘?
Maigröön bringst du mi,
Maigröön, Marie!

 

Wenn wi düt Gedicht neger bekiekt, so steiht denn doch dat Gröön vun den Mai nich blots för de Natur, de ut sik rutkümmt – is mehr noch en Bild för twee junge Bruutlüüd, de sik op de Hochtiet freuen doot. Un to’n Heiraden is de Maimaand denn ja doch jüst de richtige Tiet. Dat weer al in fröher Tieden so – un seker warrt dat ok noch lang so blieven.

Kloor hett de Maimaand noch anners wat an Klören to beden: de witten un rosa Blöten vun Appel- un Beerbööm, de vigeletten Rhododendrenblöten un noch veel anner Zoortbuntes in uns Goorn. Freut wi uns eenfach doröver!

 

Hellgröne un bunte Gröten vun

Marianne Ehlers vun den Sleswig-Holsteenschen Heimatbund

zur Startseite

von
erstellt am 03.05.2014 | 06:00 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen