zur Navigation springen

100 Sekunden Platt : Kruut un anners wat

vom

Marianne Ehlers freut sich über den wunderschönen Kräutergarten mit dem Toscana-Flair, alles wächst gut und schmeckt nach dem Süden.

Mien Krüdergoorn is en Staat. Is en Goorn as in de Toscana, mit Terracotta-Pött un Kugeln dormang, heel un deel smuck. Un rüken deit dat! De Thymian blöht as dull in lila-rosa Klören. Wenn ik den Salbei-Busch anfaten do, krieg ik den Ruuch vun de Blääd in de Nääs un heff glieks Lust, mi för mien Nudelpann wat aftosnieden.

Ok de Rosmarin passt fein dorto – jüst so de Majoran, de sik den Weg dörch den ganzen Goorn söcht un partou nich op een Steed blieven will. Maakt nix, laat em man, de Immen freut sik un suust as dull över all de Blöten.

Dat Basilikum mutt en beten mehr betütelt warrn – dat bruukt Warms un Sünn un Water un is in en Pott an’n besten toweeg. Wenn dat allens kloor geiht, kann ik den Sommer över veel Tomaten mit Mozzarella eten.

 

De Minzen sünd ok mal wedder in de Gang, nich optoholen. Wo de överall langs wöllt! Soveel Tee kann een gornich kaken as dor Blääd sünd. Man de smeckt ok fein in’n Quark un to Fleesch. All de verscheden Sorten maakt mi Freud – de een rüükt richtig na Peppermint, de anner mehr na Appelsinen oder na Ananas. Ik kann mi gornich satt rüken.

Denn is dor noch dat Currykruut un de Borretsch mit blaue Steerns. De kannst eten oder in de Melonenbowl rinsmieten, gifft en smucke Bild.

Ach ja, Petersill  heff ik ja ok noch – dat kümmt vun hier un is na mien Menen de eenzig Plant, vun de ik en plattdüütschen Naam weet. Keen Wunner, all de annern sünd ja towannert ut den Süüden. Uns Modder hett ehr nich kennt un nich bruukt – un dorüm heff ik för all düsse toscanschen Krüder ok keen noorddüütsches Woort. Ik kunn mi ja welk utdenken, wenn ik wull – man dat geiht ok so, smecken doot se, ok op Hoochdüütsch.

Gröten ut den Krüdergoorn vun

Marianne Ehlers vun den Sleswig-Holsteenschen Heimatbund

zur Startseite

von
erstellt am 31.05.2014 | 06:00 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen