zur Navigation springen

100 Sekunden Platt : Huus reinmaken

vom

Wie war das früher, als unsere Mütter und Großmütter mit dem alljährlichen Frühjahrsputz beschäftigt waren? Marianne Ehlers erinnert an diese schwere Arbeit.

shz.de von
erstellt am 26.Apr.2014 | 06:30 Uhr

Huus reinmaken – wat is dat denn? Geiht dor een bi un sprütt dat Huus vun buten af? So, dat de ganze Winterschiet mit Water afspöölt warrt? Nee, dat hett mehr wat mit dat Binnerste vun en Wahnhuus to doon.

Uns Öllern un Grootöllern, dat heet egentlich weren dat Modder un Grootmodder – de hebbt dat schietenhild kregen, wenn de eersten Sünnenstrahlen dörch de Finsterschieven keken. Dat Huus müss rein – un dat an’n Besten noch vör Oostern. Wenn dat nicht to schaffen weer, denn güng de Prozedur twüschen Oostern un Pingsten över de Bühn.

Weer dat en Opstand! Toeerst keem de Wahnstuuv an de Reeg: Disch un Stöhl na buten, dat Sofa jüst so, Gardinen af un in de Wäsch, Teppichen op de Teppichstang in’n Hoff. Dat grote Stuvenschapp wörr utrüümt, allens feucht utwischt – denn kemen Glääs un Töllers wedder op ehr Steed, man vörher wörr allens mit warme Sepenwater wuschen. Kunn ja angahn, dat sik Spinnen un Stoff ansiedelt harrn över dat Johr.

Denn wieder: Finstern waschen, buten un binnen, Rahmens un Dören afsepen, nich de Lamp vergeten!

 

Un buten kreeg wieldess de Teppich düchtig wat af mit den Teppichklopper. De Winterstoff müss rut – Disch un Stöhl müssen ok noch afseept warrn. Un dorna allens wedder inrümen – ok de Blomenpött nich vergeten. De weren ok den Dag över buten ween. Nu noch frische Dischdeken opleggen. De Gardinen müssen noch drögen, dat duer bit to den annern Dag.

De Huusfro un ehr Hölpsdeerns fullen avends as halvdoot in de Küssens. Oma harr sik den Dag över üm dat Eten un de Kinner kümmert – un de Mannslüüd harrn en groten Bagen üm de ganze Akschoon maakt.

Den tokamen Dag güng dat wieder, nu keem de Slaapstuuv an de Tour, Betten rut, Matratzen an de Luft un so wieder un so wieder … so lang bit dat ganze Huus schier weer un en Ruuch vun gröne Seep un Bohnerwass in de Luft leeg.

 

Reine Gröten vun

Marianne Ehlers vun den Sleswig-Holsteenschen Heimatbund

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen