100 Sekunden Platt : Hans Kasper un Trina

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Anhand dieses Gedichtes von Johann Hinrich Fehrs erinnert Marianne Ehlers an alte Zeiten.

shz.de von
12. April 2014, 06:30 Uhr

So heet en Gedicht vun den sleswig-holsteenschen Schrieversmann Johann Hinrich Fehrs. Mit den Humor harr he dat nich so, sien Texten sünd mehrstendeels recht wat nadenkern. Man hier schuult dat Vergnögte doch dör, höört wi uns dat mal an:

Achter Eken versteken
in'e Eck an den Beek,
dor singt dat un klingt dat
de ganze lange Week.

Achter Eken versteken
dor steiht en lütt Kaat,
dor hamert un hövelt
Hans Kasper fröh un laat.

In Köök un in Kamer,
in Goorn un in Stuuv,
dor trällert lütt Trina
as en smucke Lacherduuv.

Un kümmt de Fieravend,
denn haakt se sik in
un gaht mal na 't Roggenfeld
un Kantüffelland hin.

De Haadboor op 't Huusdack,
de klappert ehr na –
bröch he woll wat Nieges mit
vun't grote Afrika?

He weet woll, wat he segg'n will,
un sien Fru weet dat ok:
Lüüd mit lange Nesen
sünd ümmer so klook.

Sogor singen lett sik düt Gedicht, Anna Elisabeth Fehrs, de eenzig Dochter vun Johann Hinrich un Maria Amalie Fehrs, hett Noten dorto schreven. Un so leevt Hans Kasper un Trina bit vundaag hen – in Gedicht un Musik. Un wenn wi en beten wat an Fantasie hebbt, denn seht wi ehr vör Ogen.

Gröten ut de ole Kaat vun Marianne Ehlers vun den Sleswig-Holsteenschen Heimatbund.

zur Startseite

Diskutieren Sie mit.

Leserkommentare anzeigen