zur Navigation springen

100 Sekunden Platt : Grill mal wedder

vom

Der alte Dreibeingrill mit Holzkohle hat ausgedient. Marianne Ehlers macht sich Gedanken über die verschiedenen Möglichkeiten der Grillkultur.

Wann füng dat egentlich an mit dat Grillen? Vör dörtig Johr oder noch fröher? Ik weet dat nich mehr so nipp un nau. Man ik weet, dat de Kultur vun dat Grillen in de verleden Johren ümmer mehr tonahmen hett.

Dat füng ja mal an mit so en slichten Holtköhlengrill. De weer ut Metall, harr dree Been un stünn wackelig. He harr en Gitter – un dat weer dat denn ok al. Nix üm un bi, keen Luxus. He hett sien Arbeit daan, veelmehr de Huusherr hett em bruukt över den Sommer un mehr as eenmal buten stahn laten. An’t Enn vun de Grillsaison kunnst em blots noch wegsmieten.

Intwüschen gifft dat allens an Komfort bi dat Thema Grillen, wat een sik blots vörstellen kann. De echten Grillers swöört wiederhen op Holtköhlen, wat dat nu gesund is oder nich. Dat is ehr egaal. Anners smeckt dat Fleesch nich, seggt se reinweg.

Man düsse Holtköhlengrills sünd nu groot un  hebbt veel Extras. Een kann kommodig stahn un bruukt  sik nich mehr krumm maken. De Köhlen warrt mit en veereckig witt Tablett anfengt, nich mehr mit en Stück vun’t Blatt oder mit Spiritus, nee, man lang nich.

Anner Lüüd nehmt en Gasgrill – de is jüst so groot as den Naver sien nieges Köhlenmodell. Man ahn Füermaken un so richtig wat för de spontane Grillparty. Un dor passt düchtig wat rop – kannst meist en Football-Mannschop mit satt kriegen. Na, denn man to.

Minnachtig kiekt de echten Grillers daal op de Lüüd, de en Elektrogrill in de Gang hebbt. Wat is denn dat? Dor kannst ja ok driest de Pann op den Heerd stellen, dat is doch keen Grillgeföhl!

Egaal, smecken schall dat ja, wat dor op den Grill kümmt an Wust, Fleesch un anners wat. Dorüm geiht dat doch – oder heff ik dor an’n Enn wat verkehrt verstahn?

 Gröten un en gode Grilltiet vun

Marianne Ehlers vun den Sleswig-Holsteenschen Heimatbund

zur Startseite

von
erstellt am 24.05.2014 | 06:00 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen