zur Navigation springen

100 Sekunden Platt : Füerwehrball

vom

Mal so richtig schön tanzen – das geht wunderbar auf dem Feuerwehrball. Davon erzählt Marianne Ehlers.

Ach, ik müch ja mal so richtig schöön danzen – mit feine Musik, de nich ut de Steckdoos kümmt, mit smucke Kleedasch un hoge Schoh – un denn de ganze Nacht hendörch. Dat weer mal wat!

So swöögst du vör di hen – un ik segg di, dat is doch gorkeen Problem! Kannst du hebben!

Kaam doch eenfach mal mit mi to’n Füerwehrball. Du büst nich in de Füerwehr, seggst du? Dat maakt doch nix. Kannst liekers mitkamen, dat lohnt sik, ik segg di dat.

Woans dat dor togeiht, wullt du weten?

Also, toeerst mal stoovst du di düchtig op, dien Auto lettst du an’n besten tohuus. Vörher warm drinken bruukst du di nich, dor gifft dat noog. Un denn geiht dat los. Villicht laadt di sogor een in, denn bruukst nich mal Intritt betahlen.

Kiek mal, sünd de nich staatsch, all de Mannslüüd in de Füerwehr-Uniform? Un danzen köönt de! Man sowiet sünd wi noch lang nich. Eerstmal warrt begrött. De Füerwehrhauptmann snackt, denn snackt de Börgermeister, denn de Baas vun de Füerwehr vun’t Naverdörp, denn de vun dat anner Naverdörp. Villicht snackt ok noch de Paster.

Dorna kümmt dat Theaterstück. Ahn Theater is dat keen richtigen Füerwehrball. De Theatergrupp hett seker wedder en feine Stück inöövt. Warrst al sehn, wi warrt uns seker wedder een aflachen.

Un denn warrt Losen verköfft. Villicht winnt wi ja wat, en Präsentkorv oder en Eten för twee. Un wenn nich, maakt doch nix, hebbt wi even Glück in de Leev.

Wenn de Musik denn losleggt, is de Danzbodden glieks proppenvull. Du warrst dat al sehn. Un denn de Sektbar – af Klock ölven is dor meist keen Platz mehr frie.

Wat treckst du för en Gesicht? Ach so, du meenst …? Keen Bang, in de Nacht warrt dat nich brennen. Un wenn doch, de Navers-Füerwehrlüüd övernehmt den Deenst. Man to, amüseer di!

 

Blaulichtgröten vun

Marianne Ehlers vun den Sleswig-Holsteenschen Heimatbund

zur Startseite

von
erstellt am 11.Jan.2014 | 06:30 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen