zur Navigation springen

100 Sekunden Platt : De Tiet steiht still

vom

Die Tage zwischen Weihnachten und Neujahr – wie verbringen wir sie wohl? Darüber macht sich Marianne Ehlers Gedanken.

shz.de von
erstellt am 28.Dez.2013 | 06:30 Uhr

Wenn Wiehnachten vörbi is un dat Niege Johr noch nich dor – denn hangt wi all so en beten in de Luft. De Fierdaag hebbt wi goot överstahn. De Goosbraden weer allerbest, de Rouladen an’n ersten Fierdag bi de Swiegeröllern kunn een ok nich stahn laten. Un denn dat ganze Üm-un-bi an Kroketten, Rootkohl un Arfen un Wuddeln, de Wien, dat Beer…

Also, Wiehnachten weer fein. Wi hebbt smucke Saken schenkt kregen – un dree, veer Gootschiens vun de Kinner. Mal sehn, wo lang dat duert, bit wi de inlööst kriegt.

En poor Daag noch, denn köönt wi dat Ole Johr in de Tünn pedden. Wat maakt wi denn nu all de Tiet? Lüüd besöken, in’t Kunzert gahn, na buten rennen un de frische Luft geneten? Wi kunnen ok lesen oder en Film kieken, mit de Kinner dat niege Speel utproberen. Un mit de Wiehnachtspost sünd wi ok nich to Enn kamen – un hebbt ganz veel Post vun Lüüd kregen, de wi jüst nich schreven hebbt. Schiet ok! Dor kunnen wi uns ja nu mal um kümmern. Ja, dat kunnen wi...

Un dorbi blifft dat denn ok. De Daag sliekert sik so hen, wi kriegt nix so richtig op de Reeg, wo kann dat blots angahn?

Dat is de Tostand twüschen de Johren, welk Lüüd seggt ok „Twüschen de Daag“ dorto. Vun fröher her is dat en besünner Tiet. Uns Oma hett nienich wuschen in de Tiet, de Wäsch müss bit na Neejohr töven. Un bit nu hen is dat so en Geföhl, as wenn de Tiet still stahn blifft, as wenn de Minsch sik verpusten schall. Kumm her, wi maakt uns dat kommodig un haalt mal de olen Biller vun Oma un Opa ut de Kist. Kiek mal hier, uns Grootöllern in Fierdagskleedasch, wann is dat denn? Achtern steiht dat Datum op: 28. Dezember 1949 – Wir haben geheiratet. Is dat nich mal schöön? De tominnst hebbt wüsst, wat se mit ehr Tiet anfangen kunnen!

Gröten twüschen de Johren vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen