100 Sekunden Platt : De Isenbahn-Oma

Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.
Marianne Ehlers ist Diplom-Bibliothekarin und Plattdeutsch-Expertin beim Schleswig-Holsteinischen Heimatbund.

Eine unterhaltsame Fahrt mit der Bahn von Hamburg nach Flensburg schildert Marianne Ehlers.

shz.de von
21. Juni 2014, 06:30 Uhr

Bastian un Oma Gerda föhrt mit de Isenbahn vun Hamborg na Flensborg. Oma Gerda is bi Bastian un sien Öllern to Besöök ween – un nu will Bastian mit ehr na Flensborg un en poor Daag bi ehr blieven.

„Fein, dat du mitkümmst, Basti,“ seggt Oma Gerda, „denn is dat nich so langwielig för mi.“ Se vertellt sik wat. Se snackt över dat Footballspeel, dat se sik güstern avend in’t Fernsehn ankeken hebbt. Oma Gerda kennt sik ut mit Football. Denn snackt se över de School. „Schall ik di mal dat ABC bibringen?“ fraagt Oma Gerda.

Basti kickt ehr verwunnert an. „Dat kann ik doch!“

„Pass op, dat is en Speel, un dat geiht so: ik maak en Satz, in de all de Wöör mit den glieken Bookstaven anfangt. Un denn maakst du en  Satz.

En Satz mit A:

Acht Adeboors arbeidt achtern alleen, aver acht Aadler angelt an ’n Avend, aha!“

Basti juucht, dat gefallt em. „Un nu maakst du en Satz mit B!“ Oh, dat is swoor, Basti mutt lang överleggen. Man denn fallt em wat in:

„Bi’t Ballspelen böögt Bibi Brummbär blaue Blööm bisiet!“

Dat maakt Spaaß!  Nu fallt de beiden luder höögliche Sätzen in:

„En Elefant eit en Esel. Eh, eh, eh, Elefant – en Esel eien? Echt elefantös!“

„Fru Fleeg findt feine Fleuten, fleut Flegenleder för Flegenkinner, fidelt Flegenmusik för Flegenkollegen.“

„Swore swarte Schachteln staht seker, seggt Susi sik – Susi seggt sik, swore swarte Schachteln staht seker.“

Un so geiht dat munter wieder.

De beiden markt gornich, wo gau de Tiet vergeiht. Un in Flensborg kümmt de letzte Satz, se wöllt wat plücken:

„Flensborger Flederberen för feinen Flensborger Flederbeersaft!“

Gröten ut de Iesenbahn vun

Marianne Ehlers vun den Sleswig-Holsteenschen Heimatbund

zur Startseite

Diskutieren Sie mit.

Leserkommentare anzeigen