zur Navigation springen

100 Sekunden Platt : Aprilmaand

vom

Marianne Ehlers stöbert in alten Wetterregeln, die sich den Monat April vorgenommen haben.

shz.de von
erstellt am 05.Apr.2014 | 06:30 Uhr

Nu hebbt wi den April tofaten, düssen luunschen Maand – tominnst, wenn wi mal henkieken doot, wat de olen Regeln för dat Weder so seggt. De April deit, wat he will.

Süh, dor hebbt wi dat glieks. Düssen Snack kennt wi all. Un so geiht dat munter wieder – meist in de glieke Richt:

De April hett sien egen Will. De April hett Grill, dat meent, dat he luunsch is. Nu aver: Aprilweder un Fruenssinn is wunnerlich vun Anbeginn.

Na, sowat schull een egentlich gornich to Papeer bringen, wat meent de Fruens dorto?

Mitünner kann dat ja noch mal koolt warrn – so heet dat denn:

De April is to goot,
he gifft en Tuunstaken ok noch en Hoot.

Kloor, dormit is de late Snee meent – de ok hier in den nächsten Snack en Rull speelt:

Dor is keen April so goot, he schickt den Scheper Snee op den Hoot.

Nee, dat wöllt wi nich mehr, na Küll un Snee is uns nu nich mehr tomoot.

Kann aver ok wat anners geven:

Swemmt de April Gewidder ran, gaht de Nachtfrösten sacht dorvun.

Man he kann ok Roh geven, düsse Maand – un denn gifft he allens an den nächsten Maand wieder:

Is de April en rohig Kind, denn maakt de Mai en bösen Wind.

Na, dor hebbt wi denn ok nich jüst Menen to – un so kann uns ok düsse Regel nich so na de Mütz ween:

Wasst in den April veel Gras, blifft de Mai koolt un natt.

Nu mööt wi lang spikeleren, för wat för en Snack wi uns entscheden wöllt. Is nich eenfach, dünkt mi. Un denn doch wedder. Wi mööt uns gornich entscheden, denn wat hebbt de Olen fröher al seggt: „Kannst nich an dreihn“ – und dat is goot so!

April-Gröten vun Marianne Ehlers vun den Sleswig-Holsteenschen Heimatbund.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen