zur Navigation springen

Plattdüütsch Zentrum Leck : To en faste Institution för de Plattdüütschen entwickelt

vom

Dat Plattdüütsche Zentrum in Leck is 15 Johr old worrn. Ohn’ de Fördervereen mit sien 200 Mitglieder kunn meist allns nich lopen.

shz.de von
erstellt am 04.Nov.2009 | 06:25 Uhr

Nordfreesland | Wat heet egentli Gänseblümchen op Platt? Un wat "Mann ine Tünn" bedüden deit, much ik ok geern weten." So sorgt dat Quiz vun dat Schleswig-Holstein-Magazin för Beschäftigung in dat Plattdüütsche Zentrum. 15 Johr is dat Zentrum in Leck dit Johr old worrn un hett sik to en faste Institution för de Plattdüütschen entwickelt.

Dat lütte Jubiläum is fiert worrn mit twee Veranstaltungen. De Arbeitstagung "Twee is mehr as een" schull warven för mehr Plattdüütsch in de Kinnergorns un de norddüütsche Band "Godewind" kreeg ünner de Oogen vun Landdagspräsident Kayenburg dat "Grote P", de "Plattdüütsche Oscar", för dat plattdüütsch-musikalische Levenswark.

Bummeli 100 junge Schoolmeisters besöken Johr för Johr dat Zentrum, finn so en Togang to de Plattdüütsche Spraak un laten sik wiesen, wat se mit Plattdüütsch an de School allns maken könnt. Schoolkinner ut Bredstedt un Leck hebbt bi Projektdage in dat Zentrum vörbikeken. Un en Schoolmeister-AG sammelt allns an Material, wat man för Plattdüütsch-Ünnerricht bruken kann. Dat Zentrum plaant mit bi dat jährliche Plattdüütsche Theaterdrapen op de Scheersbarg. Un de Plattdüütsche Leeswettstriet vun de Schleswig-Holsteensche Heimatbund SHHB hett ok jüst wedder anfungen.

Dat Plattdüütsche Zentrum söcht Kontakt to Vereene, vermittelt Hölpers för Plattdüütsche Aktivitäten un will jümmer wedder de Gesellschaftsfähigkeit vun Plattdüütsch nawiesen - ob nu in Politik oder annere öffentliche Gremien. Dorto hört de Mitarbeit in plattdüütsche Utschüsse vun dat Institut för Nedderdüütsch in Bremen, bi de SHHB oder in de Birat Plattdüütsch bi de Landdagspräsident in Kiel.

Ohn de Fördervereen för dat Plattdüütsche Zentrum in Leck kunn meist allns nich lopen. Över 200 Mitglieders stütten de Arbeit vun dat Zentrum. Vörsitter Helmut Wree un Zentrums-Leiter Ingwer Oldsen hebbt 2009 en "Amtsbereisung" dörchföhrt. Bi de negen Amtsutschüsse Treene, Eiderstedt, Mittlere Nordfreesland, Südtondern, Eggebek, Oeversee, Kropp, Schafflund un Viöl is de Fördervereen un dat Plattdüütsche Zentrum vörstellig worrn un de beiden hebbt Informationsmaterial verdeelt. Dorbi kunn man 248 Utschussmitglieders ut 146 Gemeenden faat kriegen - 90 Gemeenden un Ämter dorvun sind Mitglied.

Totied warrd plaant an en Kinnergornveranstaltung an de 24. November int Landeshuus in Kiel un an en Plattdüütsche Wiehnachtsfier in de Nordsee-Akademie in Leck an de 11. Dezember. Lesen warrd Pastor Dirk Römmer ut Tönn un Musik kummt mit Ernst-August Autzen ut Langenhorn. Un ok Hans Ahrenstorfs Stiftung "Mien Moderspraak" will noch in de Vörwiehnachtstied Geld för Plattdüütsche Arbeit an utsöchte Schoolen un Kinnergorns in Niebüll, Olderup un Tetenbüll vergeven.

Mit en Struuß Dusendschön garalleert de Leiter vun dat Plattdüütsche Zentrum, Ingwer Oldsen, de sh:z to de Literaturpries vun Kappeln un freut sik, dat ok dat Zentrum över Zeitungsartikels för de Plattdüütsch-Freesche Siet un mit plattdüütsche Videostreams to dat Winn vun de Pries bidregen kunn.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen