Hat jeft en nii Ütsteling

von
04. November 2013, 00:31 Uhr



Di Skelter, wat bi üüs üp Söl ön´t Museeum aur Muunen fan Föör tö Bisjuk wiar, sen nü weder tö jaar Ailön töbeek raiset. Nü jeft dit weder en nii Ütsteling, hur dit nü om C. P. Hansen en sin Leewent gair. C. P. Hansen es 1803 ön Weesterlön béren en 1879 ön Kairem stürwen. Hi wiar Skuulmaister en Orgelspölster en sent 1835 wiar hi uk Köster ön Kairem. 1838 grünelt hi en Skuulmaisterforiining hur da Nann Mungard en Boy Peter Möller bi höm tö Skuul ging. Uk ja haa jam leeter stark fuar di Sölring Spraak iinseet.

1844 heer C. P. Hansen da iinfriit ön Kairem ön´t Ual Hüs. Jir bigent hi da uk al sin Saamling fan Stiin en ual Saaken tö forgurterin. Di Stiinsaaken wiar uk al aur maning Jaaren ön´t Museum tö sen. Dat wü di Museen haa, haa wü jaa uk höm tö fordankin. Dit Ual Hüs her hi jaa al salev tö en litj Museeum maaket me sin Stiin en sin ütstopet Fügler. En boowen üp Bualkem her hi höm me Forlof fan sin Wüf en litj Rüm ütbecht, hur hi set kür en da aur Heef luket en sin Boker skriiv kür. En hi heer maning Boker skrewen, diarfan sen „Der Sylter Friese“, „Der Badeort Westerland und seine Bewohner“, „Die nordfriesische Insel Sylt, wie sie war und wie sie ist“ en „Ual Sölring Tialen“ man en litj Diil fan sin bikeenst Boker wat hi skrewen heer.

Dit jest Lop fuarstelt uur di Ütsteling nü di 10. Nowembermuun ön´t Museeum ön Kairem om Klok fif, hur em C. P. Hansen da uk förter bisjuk ken. 50 Jaar eeder sin Duar skreew Jens E. Mungard höm tö Iar dit Dechting: „Wat wiar üüs Ailön Söl wel söner di? Bluat en Plak Öört bi Friislöns Rand. En wat jir jer jens wiar, dit wiar fuarbi, en gre lair´t al, auriiten en tökant.“
Üp Dütsk: „Was wäre unsere Insel Sylt wohl ohne dich? Nur ein Fleck Erde an Frieslands Rand. Und was hier früher einmal war, das wär vorbei, grau läg alles, vergessen und am End!“

zur Startseite

Diskutieren Sie mit.

Leserkommentare anzeigen