Wat ein Wunner

De hochtechnisierte Landwirtschaft vun hüüt!

von
06. Juni 2014, 17:24 Uhr

Mittwoch, den 28. Mai, Klock fief, beeten trübes Weeder. Da will Swiegersöhn Maik mit den Trecker vun Hoff feuhren. An den Trecker allens an ton meihn. „Nanu“, segg ick „wohen so laat?“ Ick wüss ja, de Koppel, de hei ass eistet meihn will, is 4,9 Hektar, also bald twintig Morgen groot. „Gibt gut Wetter, hab die Praxis eine Stunde früher geschlossen.“ Klock fief, denk ick, an sonn Koppel heff ick den ganzen Dag meiht, wenn allens gaud güng. Viertel na söss Uhr, ick mit Monika los, dat heit, se mit mi. Ick kann noch fix feuhrn, aber se feuhrt beeder. Se is bi ehren Vadder Taxifahrerin west.

Twintig na söss sünd wi up de Koppel un seiht noch graa wi Maik de beiden Meiher automatisch hochklappt. In ein Stünn un twintig Minuten is hei trecht mit de Wisch. Wat ein Wunner, hei hett ein Siedenmeihwark un ein vörn. Mit Öberlappen meiht hei 6,20 Meter! Un ein Huupen Gras licht da. Maik hett so ein Superstriegel, de kann ock inseihn un so hett hei edle Gräser, Düütsches Weidelgras un sowat biet Strieln mit inseiht.

Dat is bi dat gaude Freuhlingsweeder rein dull wussen un nu liegt da Swaden, sowat heff ick noch nich belewt. Nächsten Dag wirbeln, dat Gras ward doarbi wendt. Ock de Wirbler is öber söss Meter, achter em fliegt dat Gras hoch ass sonn greunen Schwall. Freidag würr schwadt. „Nimm den lütten Schwader, de moakt ock bi de Umenge ganz lütte Reegen“, heff ick em rat. Aber ne, mit sonn Speelwark arbeit Maik nich, also ran mit den Doppelschwader.

Un denn Sünnabend dat meuhselige Pressen. Mit de Menge vun Heulage würr de Press man so eben trecht. Hätt duert, bet wedder sonn Quaderballen ruutkeum, denn hei kunn man twei Stunnenkilometer feuhrn. Aber halbig ölben abends weur hei trecht. 135 Quaderballen, nich to glöben. Ton Glück hebb wi ein eegen
Wickelmaschin, bruuk nich mit Angst un Schrecken up ein Ünnernehmer teuben.

An Sünndag hebb se de Ballen inwickelt, bet nachts halbig twölf hebb se arbeit. Müssen se ock, denn pünktlich Moandag müss Maik ass Herr Doktor wedder in sien urologische Praxis sien. Philip un Bine hebb dull holpen, hebb ock de Ballen in ein Miete packt.

Mien oolen Chef Max Schwark hätt mi vertellt, wie se in sien Jugend sonn Koppel meiht hebb. Mit veir Mann weurn se doarbi jeden Schwung mit de Lei bröcht tein Zentimeter. Tweimal Schwung un denn twintig Zentimeter vörwarts goahn. Wat ein meuhseligen Kram un wi kaputt weurn se an Abend. Hätt sick bannig ännert vun damals bet to de hochtechnisierte Landwirtschaft vun hüüt!

zur Startseite

Diskutieren Sie mit.

Leserkommentare anzeigen