Swalken in Peerstall

Söben Stück sünd dat meist

Avatar_shz von
21. Juli 2014, 11:31 Uhr

An un för sick bün ick ein öllichen Minschen. So heff ick denn in Freuhjoahr den Gang vun unsen Peerstall scheun uprüümt un sauber fegt. In Winter sünd nämlich in de Boxen junge Rinder in un de ganze Gang licht vull l Heu un Stroh un Tüten un Ammer un ick weit nich wat. Also Gang wedder öllich moakt un de ganzen Wannen ( Wände) mit Kalkfarf streeken. De Dören sünd mit blage Ölfarf anmalt, de heff ick wuschen. In twei Boxen vun den ehemaligen Peerstall sünd de Ställe för mien Kninken, Dwarge, sneiwitt mit blage Oogen. Dat kann jümmer sien, dat mien Kameraden uut den Kleintiertuchtverein Sandesneben mal rinkiekt.

De Vörsittende Michel up jeden Fall, denn de moakt dat Tätowieren. Aber ock annere sünd all dawest. So mutt denn de ganze Stall sauber, wat segg ick, leuchtend uutseihn. Un wenn ick allens trecht hebb, denn koamt de Swalken (Schwalben). Wenn wi de eiste seiht, denn freut wi uns. Denn weet wi, nu fangt dat scheune Freuhjoahr an. Denn kümmt de groote Schub vun de wiede Reis uut Afrika un gliek wedder rin in unsen oolen Peerstall.

Den mög se tau gern denn de hätt baben an de Deek Balken un da könt se so wunnerboar ehr Nester anbacken. Söben Stück sünd dat meist. Babenhen sünd ock in Sommer männigmal Tieren im Stall Starken de later kalwt un weck Jungbullen. Un wo Tieren sünd da sünd ock Fleigen . Un Fleigen mög de Swalken an allerleiwsten. Ick weit dat, ick bün mal Swalkenvadder west. De Swalken sleept also Lehm ran un buut ehr halfrunden Nester. Wonem se bi unsen Sandboden den Lehm herkrieg, weit ick ock nich. Ein ooles Gedicht fangt nämlich so an: „In Grootensee is Ach un Weh!“ Dit Joahr heff ick ehr ein Nestplatz verboaden. Dat is öber de Tafel mit de ganzen Priese de ick bi Foahlenschauen un Uutstellungen gewunnen heff. De hebb se mi int Vörjoahr för Gewalt vullscheeten. Öberhaupt schieten könt de Lütten, dat is nich to glöben. Jümmer kiek se öber den Nestrand, riet de Schnabels un moak Geschriech. Un denn hurra up de witten Wände un de blagen Dören. Mien Swalkenwinzling, den wi mit de Hand uptrocken hebb, freet an einen Dag 117 Fleigen, gehacktet Ei un beeten Hack. Kannst di vörstellen, wat de ganzen Bruten in Peerstall allens in Boagen vullschieten könt!

Jümmer up de sneiwitt gekalten Wannen, de blagen Dören un den geschrubbten Gang. Bi de Flugeubungen in Peerstall suust se rüm un droab allens wat noch sauber is. Aber moakt nix, Swalken bringt Glück un wenn se so elegant öber den Hoff suust funkelnd ass lütte blage Blitze, denn geiht mi dat Hart up.

zur Startseite

Diskutieren Sie mit.

Leserkommentare anzeigen