zur Navigation springen
Stormarner Tageblatt

17. August 2017 | 21:53 Uhr

Oosterbild

vom
Aus der Redaktion des Stormarner Tageblatt

De Plattschnackers vertellen

Ick müss tweemol kieken. Kunn dat wohr sien? Een Deern danzt mang de Graffsteden? Hett sick sülben ganz vergeten. Weet ok nix dorvun, dat dor een kieken deit. Villicht will se ehr Oma wiesen, wat se in de Ballettschool
lehrt hett. Oma hett ehr ümmer Moot mookt. Villicht ööwt se ok bloots so vör sick hen. Een lütte Deern danzt mang de Graffsteden.

Ut de Büsch blangenbi schmettert
een Tuunkrüper, as wull he ehr den Schwung to ehrn Danz gewen. De Wind geiht sacht, un de Deern danzt noh een Musik, de ick nich höörn kann. Se danzt de Blomen ut de Eer, de Schlötel-Blomen un de
Violen un dat Scharbockskruut mit sien bottergele Blöhgesichter. De eersten Immen fleegt. Een Botterlicker dammelt öber de Graffsteen.

Dor, wo dat Andenken an de Doden de Minschen stiller mookt, danzt een Deern. Dor, wo de Dood dat Lewen engt, danzt een lütte Deern öber den Dood weg. Se mookt dat Lewen Lust, sick wedder to rögen, noh de inschränken Winterdoog. Se danzt sick ut de stieve Betonwelt rut in dat Frie’e. Se danzt den Heben blau un treckt de Lewensfreid noh de Eer dol. Un dat Johr is noch jung, un de Dag is so jung. Un dat Lewen gript noh de Sünn, un de Sünn danzt mit.

Bilütten wend ick mi af un sett miene Stapp op dat Fröhjohr to. Un in mien Hart nehm ick een Oosterbild mit - good för tokomen Tieden: Een danzen Deern gifft mi den Moot.





zur Startseite

von
erstellt am 09.Apr.2017 | 09:37 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen