zur Navigation springen
Stormarner Tageblatt

17. Oktober 2017 | 08:38 Uhr

Allens weur trecht

vom

Nie wedder int Joahr seich de Hoff so sauber uut ass Pingsten

shz.de von
erstellt am 28.Mai.2013 | 03:59 Uhr

Ja, is den Petrus nu ganz vagelig worrn? Dat regnet un regnet oahn Enn. Un doarbi is dat ock noch kold. In Fernsehn hebb se eben vun Nachtfrost un Snei snackt. Unse lütten Dexter-Kalber, eist ein poar Weeken old, könt ton Glück bi Regen in de groote Zelthall ünnerkruupen. Hebb wi letzten Harfst blot mit Familienkräfte upbuut. Doartau könt se den ganzen Dag warme Melk in sick rinbuddeln, dat hüllt se bi dat Schietweeder gesund un vergneugt. Mi sülben güng dat leger, aber ick drink ja ock kein warme Melk. Öber Pingsten harr ick ein swoare Bronchitis.

Ne, Kinners ne, da verleirst du alle Lust an Leben un japst na Luft ass sonn Karpen an Land. Nu mit ärztliche Behandlung ward dat langsam beeder. Pingsten, dat weur freuher för de Buern ein besünneren Dag. De harrn nich stodeert un sowat, aber se wüssen genau, wann wat trecht sien mutt. Eisten Mai müss allet Veih ruut, egal wat förn Weeder weur. Un Pingsten müssen alle Ställ sauber moakt un frisch witschert

sien.

Mien Buer Max Schwark harr noch ein besünneres Pingstziel. De dree Ackerwagens müssen nied anstreeken warrn, un dat jedes Joahr. Dree Woagens müssen sien, ock up ein lütten Hoff. Ein Wagen weur up dat Feld un würr upladt. De tweite weur tohuus un würr affladt. Un de drütte Wagen weur, vull oder leddig, ünnerwegens. Ja, up sien dree stabilen Ackerwagens mit grootmächtige, iesenbereifte Holträä weur

Buer Max bannig stolt. Un dat Strieken weur nu mal de Upgav vun den eisten jungen Mann, also mi. De Kasten, dat güng ja noch, de würrn heebenblaag anmalt. Dat kunnst du mit ein breiden Pinsel gaud schaffen. Aber denn dat Ünnergstellt un de Rää. De würrn pickenswatt mit warmen Teer anstreeken. Da stell di mal vör, du krüppst da ünnen rüm bi de veelen Speiken, de Teer de drüppt di up den Kopp un in de Kleedasch, mien lewe Gott, dat weur ein Arbeit. Achterran müss ick mi reinifizien. Dat weur ein Akt! Da hölp kein Seip, da hölp kein Benzin. Gifft blot ein wat hölpt un dat weur Bodder.

So geiw mi Frue Schwark eist mal poar Pund, un ick füng an mi langsam in ein Minschen to verwanneln. Öberdess, de dree Döchter müssen up de Knei up den Hoff rümmkrabbeln un mit lütte Kökenmetz dat Gras un Unkruut uut dat Plaster kratzen. Genau to Pingsten weur allens trecht. Nie wedder int Joahr seich de Hoff so sauber uut ass Pingsten. Buer un Kauhviez harr de Ställe witschert de Deerns dat Plaster sauber un ick mien Wagens streeken. Un denn güng tonn Danz, dat geiw dat Pingsten öberall.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen