To’n Verpusten

nn-wort13

23-28223293_23-56994511_1417184908.JPG von
12. Juni 2015, 13:28 Uhr

40 000 Steen hett de Künstler bruukt för dat bunte Mosaik öwer dat grote Dom-Portal. He hett sik veel Möh maakt, den „Heilandsroop“ vun Jesus aftobillen. Dor hannelt de Spruch för düssen Sündag vun. Jesus seggt: „Kaamt all’ her to mi! Wer sik afrackern mutt un en sware Last to slepen hett, den will ik helpen, dat he sik verpusten kann“. Dat Mosaikbild is en Predigt ahn Wöör. Fief Lüüd föhlt sik hentrocken na Jesus: En arme Pilger mit Wannerstock un kaputten Foot; de Mudder mit en lütt Kind, dat slöppt, levt villicht gar nich mehr; denn is dor en ganz trurigen Mann, villicht de Vadder vun dat Kind, oder een, de Schuld op si laden hett; un dor kummt noch en „Knastbroder“ mit Keden an de Fööt op Jesus to, kann ok en Slaav ween. All sünd inlaadt. All sünd kamen. Dor höört ok de mit to, de sik Angst üm de Tokunft maakt; de ünner Striet un Unfreden lieden mööt; de böös krank sünd; de sik sülm to Last warrd; de op de Flucht sünd. Jesus wull to sien Tiet de Lüüd ehr Last nich eenfach afnehmen. Dat kunn he ok gar nich. Awers dörch sien Woord, dörch dat Gebeed un den Gottesdeenst kann he hölpen, dat een sik verpusten kann. Ok hüüt noch. Denn gifft dat niee Kraft, niee Utsicht un frischen Moot. De Dom is son’n Steed to’n Verpusten un to’n Optanken. Un de annern Karken ok.
Dor warrd seggt: „Ik much keen annern to Last fallen“. To’n christlichen Globen höört dat awers mit to: Anner Minschen to Last to fallen, sik sülm helpen laten, för anner Lüüd dor to ween. Dat Mosaikbild is ok en Inladung, Jesus sien Bispill to folgen.

zur Startseite

Diskutieren Sie mit.

Leserkommentare anzeigen