zur Navigation springen
Pinneberger Tageblatt

20. Oktober 2017 | 00:28 Uhr

Steerns un Kaakmützen

vom

shz.de von
erstellt am 25.Mai.2013 | 01:14 Uhr

Pinneberg | För dat Klassifizeern vun Restorangs hebbt sik de Kökentester un Gourmet-Klookschieters ja allerlei infallen laten: Steerns un Kaakmützen un wat weet ik, vergeevt se för de "Gode Köök", un in Fackböker schrievt se dor över, wo dat goot is, un sünnerlich wo dat düer is - dat Eten. Wat en Ümstand mit all sowat!

Natürlich, smecken mutt dat Eten, dat is kloor. Un dat markt ja een ok gau sülvst. Man wat de dor "Tester" goot smecken deit, dat mutt mi ja nich jüst so goot gefallen. Ik meen, dor hett doch jedereen sien egen Smack - oder schull de tominnst hebben. Nee, wat dat Klassifizeern vun Weertshüüs angeiht, gifft dat noch anner Normen, un mit de Köök hebbt de nich jümmers wat to doon.

Ik meen avers nich simpeln Kram, as dat se dat Beer ünnern Streek inschenkt - or dat de Rotwien to koolt is - or de Service nich klappt - or dat de Luft blaag un verrökert is... Seker, dat is ok all wichtig, un ik glööv, dor kiekt de Lüüd so un so op. Nee, dor gifft noch anner Kriterien, un mi dücht, dat weern sik de Weertslüüd gor nich vermoden...

En heel egen Methood för ehr Oordeel hett mien Naversch Fieten. Un ik kann mi nich hölpen: dat stickt an! Ik sülvst kiek nu ok al jümmers na ehre Kriterien.

Se seggt, de Köken vun de Gasthüüs mutt ik mi gor nich eers ankieken. Ehrder ik mi utlaat över ne Gaststeed oder Hotel, kiek ik mi de Kloos dor an. Sünd de püük un sauber, is dat in de Köök jüst so! Un dat se Unrecht hett mit düt "Indiz", kann ik mi nich recht vörstellen. Un - gediegen - vun düssen Snack kann ik mi gor nich recht losmaken! Ofschoonst ik egentli en heel annert Kriterium för ne Gaststeed heff, de mi op Duer gefallen schall.

Ik, as Mann, bün nämlich alltiets ut op godes un scharpes Warktüüch. Un so kiek ik jümmers toeers op de Messen, de se mi int Gasthuus opn Disch leggt. De mehrsten Messen, de een anbaden warrt, sünd gor keen Messen; denn snieden doon de nich! Sünd ehrer sowat as en Quetschwarktüüch.

Heel dösig sünd doch de Gastronomen, de womöögli to en taget Stück Fleesch noch en stumpet Mess levert! - Un wennt gor to leeg keem, heff ik denn un wenn al mien scharpet Taschenmess ruthaalt.

Kannst ja nich jümmers un överall meckern, tomaal nich int Utland. Un wenn de Weertslüüd op düt Rebeet drüttklassig sünd, dennso hebbt se dat ok nich anners verdeent, as dat ik denn maal mien Klappmess ruthaal na den Spröök: "Blots dumme Weertslüüd hebbt stumpe Messen!"

Ik glööv, dat gifft en Barg Gäst, de denkt ok so; un dat weer woll so verkehrt nich, wenn de Weertslüüd, de dat angeiht, dat maal to weten kregen...! Man dat Lege is: De mehrsten vun de Gastronomen köönt nich Plattdüütsch lesen - un wenn se dat köönt, warrt se en Düvel doon un sik wat dorbi denken. Un dorüm warrt se ok wieder so blieven as se sünd, düsse Gastro-Normen.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen