zur Navigation springen
Pinneberger Tageblatt

20. August 2017 | 22:01 Uhr

Röhr um, röhr um!

vom

Pinneberg | Dat heet ja jümmers, "Schadenfreid is de schönste Freid". Dat mag woll ween, avers fien is dat ja nich! Wat ik nu vertellen will, dat liggt al meist hunnert Johr trüch, un keeneen von de dor Lüüd leevt nu noch; un so mag dat angahn, dat ik dorvon snacken kann. Schaden kann dat nu nüms mehr.

In Wyk op de Insel Föhr harr üm de Johrhunnertwenn - un ok later noch - en Bäcker un Konditer siene Backstuuv an de Sandwall. De Mann hett Steigleder heten un keem ut Öösterriek. Woans schull dat son Naam sünst ok woll geven?

Op de dor Inseln hebbt de Lüüd, de von utwärts kaamt, dat nienich licht hatt. Se wurrn jümmers scheef ansehen un wennt jichens güng, wurrn se ok düchtig veräppelt. Dat weer nu mal so Usus.

Uns Konditer Steigleder harr en Fru, de hett wohrraftig Thekla heten. Tjaa, wo kann en Mensch nu Thekla heten un mang de Inselfreesen wahnen? Gottloff harr düsse Thekla en Fehler, un de Wyker bruken nich lang to söken, wat se ehr anhangen kunnen: De Fru harr en stievet Been, un so harrn de Wyker gau en Veers paraat, ehr to veräppeln: "Thekla hett en holten Been, dat weet ik blots ganz alleen, denn se hett sik dor gescheit en Gummiafsatz ünnerdreiht."

Nu begeev sik dat eenmal, dat de Konditer för de Backstuuv Törf kriegen schull. De wurr bröcht op en Wagen, un twee Lüüd bröchen den Törf in ehre Klüünkörv op de Schuller dör de Backstuuv na achtern.

As en vun de Kerls mit den Klüünkorv op de Schuller mit sien vulle Korv an den Döörrahmen stöten dee, floog en Deel Törfmull jüst in en Bottich mit Kokendeeg rin.

As de anner vun de beiden dat sehg, reep he gau: "Röhr um, röhr um...!" Un dat deen se denn ok. Nu hett laterto keeneen markt, dat in de Koken Törf weer.

Avers de beiden Leveranten - de dor Schubiaks - kunnen nich dichtholen un hebbt laterhen sik dickdoon mit dat Malöör. Un siet de Tiet kann in Wyk sik keeneen dat Grienen verkniepen, wenn he den Namen Steigleder höört, un tominst in Stillen seggt denn jeedeen foorts dat dore Woort: "Röhr um, röhr um...!"

zur Startseite

von
erstellt am 17.Aug.2013 | 03:14 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen