zur Navigation springen
Pinneberger Tageblatt

17. Oktober 2017 | 03:14 Uhr

De ool Fro un de Jieper op Bonbons

vom

shz.de von
erstellt am 18.Mai.2013 | 01:14 Uhr

Pinneberg | Dat stünn bi uns int Blatt, is aver in Mailand passeert. Harr dat bi uns ok passeern kunnt?

De Fro weer al wat öller. Meist sünd de Oppasser inn Supermarkt jo nich so scharp bi de öllern Lüüd, sünnerlich nich bi öllere Froons, de jemehr Grootmudders ween kunnen. Un sünnerlich in Südeuropa warrt de öllern Lüüd mehr estemeert as bi uns.

Gegen de hett nüms Verdacht. Bloß de Oppasser in düssen Supermarkt, den keem de Fro verdächtig vör. Se stünn vör den Söötkraam, güng dor hen un her, keek sick um un denn - kann dat angahn?! - denn greep se en Tüüt mit Bonbons un leet de in ehr Manteltasch verswinnen.

Se weer verbaast, as de Oppasser op ehr tokeem. Se weer beschaamt, as de ehr to den Geschäftsföhrer broch. Dorför weer de Oppasser doch Oppasser, dat he oppassen dä. Un dat wull he den Chef doch wiesen, dat he keen Pardon kenn - ok nich bi en ole Fro.

De Chef kenn ok keen Pardon - dor kunn de Fro noch so veel blarren un bidden un bedeln. De hett de Fro fastholen. Hett de Polizei anropen, ofschoonst de annern Kunnen schüddkoppen un sään, wat dat en Bagatelle weer. Bagatelle oder nich: Dat güng um dat Prinzip. Dat weer en Supermarkt.

Un inn Supermarkt wöörn de Saken verköfft, nich verschenkt. Dat schull en Fro weten, sünnerlich in ehr Öller. Wat schull he den mit Kinner maken, wenn he dat bi en öllere Fro dörgahn leet. Tja, wat schull he maken?

De Fro seet dor as en Hopen Unglück. Weer ok woll nich veel mehr as en Hopen Unglück. Stamer jümmer, dat se keen Geld harr, dat se unvermodens son Jieper kregen harr, dat se dat nie nich wedder doon wöör.

Oplest keem de Polizei, kemen twee junge Keerls in Uniformen, fragen, worüm de Geschäftsföhrer jem ropen harr. De vertell, wat passeert weer, höll dat "Corpus Delicti" de Polizisten ünner de Nääs.

De leten sick den Utwies von de Fro wiesen, leten sick von ehr vertellen, wat passeert weer un dat se keen Geld harr, sehgen in den Utwies, dat de Fro sössunsöbentig Johr oolt weer. De jüngere von de Polizisten keek de Fro an, fraag denn, wat de Bonbons kosten wöörn.

"Dree Euro tachentig", sä de Geschäftsföhrer.

De Polizist nehm sien Geldknipp, tell den Geschäftsföhrer dree Euro tachentig op den Disch, höll de ole Fro den Arm hen, dat se sick dor inhaken kunn un güng mit ehr dör den Laden, as wull he mit ehr ton Ball. De Kunnen klatschen. De Supermarkt-Geschäftsföhrer sehg oolt ut.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen