zur Navigation springen
Pinneberger Tageblatt

20. Oktober 2017 | 15:21 Uhr

De Mondagsfro

vom

shz.de von
erstellt am 11.Mai.2013 | 01:14 Uhr

Pinneberg | Ick sett mi opt Rad, föhr in den Botanschen Goorn. Dor is de Wisch bunt von all de Bloomen. Dor platzt al de Magnolien an de Bööm. Dor heevt sick ungelenk graziös en Fischreiher in de Luft. Ick heff mi en Book mitnahmen. Man ick sitt un drööm un kiek ... seh en öllerhaften Keerl, de sick vör en öllere Fro daalböögt.

"Dörf ick mi to Se setten?"

Se kickt hoch: griese Hoor, fründlich Gesicht. Se kickt kort op all de leddigen Bänk in den Park.

"Klor doch." Se rückt an de büterste Siet von de Bank.

"Schön hier in de Sünn."

Se nickkoppt. Vör de Bank denert en Düffer ievrig um sien Duuv rüm.

"Dat Vörjohr hett de Duven de Köpp verdreiht."

"Villicht", se grient kort, "villicht blots den Duvenkeerl?"

"Wenn de Duvenlady dat nich wull, kunn se jo wegflegen."

"Jo, kunn se woll."

"Deit se over nich." He grient.

"Nee", seggt se, "un wat lehrt uns dat?"

"Dat ehr dat gefallt."

"Dat is woll de Sicht von den Düffer."

He tögert. In de Boom kraakt de Kreihen. "Wat Kreihen ok Vörjohrsgeföhle hebbt?"

"Ach wat", se grient, "de sünd ut dat Öller rut."

"Lett meist so. Ick meen, wegen de ehr swadde Kledoosch." He kickt op de Kreihen. De Düffer gockelt jümmer noch um sien Duvenlady rüm.

"Koomt Se blots mondags in den botanschen Goorn?"

"Wo weet Se dat von, dat ick meist mondags hier bün?"

"Se sünd mi opfullen."

"Worüm?"

"Schöne Froons fallt mi jümmer op."

"Un schönere hebbt Se nich to Gesicht kregen?"

"Heff ick denn woll nich."

"Dat duert mi over." Se kiekt op den Düffer, de jümmer noch um sien Duuv rum denert. Se hört dat Kraken von de Kreihen.

"Sünd de Minschen mehr as de Duven oder mehr as de Kreihen?"

"De Minschen", se grient, "de gurrt to Anfang as de Duven un schafudert loter as de Kreihen."

"Dat mutt over nich so ween", seggt he.

"Man is foken so."

"Mutt over nich!", seggt he opsternootsch.

Se hört den Düffer gurren, de Kreihen kraken. Warm schient de Sünn vonn Heven.

"Dorf ick Se mien Visitenkoort geven?", froogt he.

Se smustert; nimmt de Koort. "Ick heff so wat gor nich".

"Wöörn Se mi denn ehrn Noom seggen?"

"Ick...", se tögert, ick bün de Mondagsfro."

Ick klapp mien Book to. Wat schallst ok lesen, wenn dat so veel to sehen, to rüken un to drömen gifft.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen