Dat ölvte Geboot

Avatar_shz von
02. Februar 2013, 01:14 Uhr

Pinneberg | So loov ik mi dat, sä de krummschnvelige Ibisvagel un keek in de Blickdoos, wo sik de Kakerlattjes in dree Schichten övernanner afstrampeln deen.

Wenn de Minschen jüm in solk öölvte Blickpütt fangt, denn mutt ik mi den Snavel nich verrenken un Krupers as jüm ut de Steenritzen rutkleihn. En echten Sörviss is dat, sä he luut un wull sik al een rutpicken."Dat gönn ik di", schreeg dor een ut de bavelste Laag vun de Kakerlattjes.

"Freet uns man, du warst al sehn, wat du dorvun hest, du ole Nimmersatt. Gift hebbt de Minschen hier rindaan, un starven mööt all, de dorvun wat afkriegt! Un du ok, du raffige Krummsnavel!" Do keek he verschraken, de Ibis, schuul eers mit een Oog na de Krabblers in ehr Fängnis un denn mit dat anner Oog, un denn stolzeer he bisiet. He leet de vergifteten Krupers dor strampeln un keek sik na Metten un Loopkävers ut.

Nahsten full indess en dröge Twieg in de Blickdoos, de inwännig mit Ööl insmeert weer. Dor kunnen de Kakerlattjes leifig an hochkladdern un in de Frieheit kamen. Opn Weg in ehr Versteken frögen se em, de mit den Ibis spraken harr: "Woso sääst du wat vun Gift in de Fall? Stimmt dat denn?"

"Nee, dat heff ik em blots vörspunnen. Dor weer blots en beten Honnig op de Grund von de Doos. Aver de dösige Vagel kennt dat ölvte Geboot nich...!"

"Dat ölvte Geboot? Wat is dat denn?"

"Oh, heel wichtig is dat. Dat heet: Du schasst di nich verblüffen laten"

Moral: Mit düt ölvte Geboot versöökt wi doch meist elkeen Dag kloor to kamen, oder?

zur Startseite

Diskutieren Sie mit.

Leserkommentare anzeigen