zur Navigation springen
Pinneberger Tageblatt

17. Dezember 2017 | 11:40 Uhr

Bring di sülvst wat to drinken mit

vom

shz.de von
erstellt am 03.Aug.2013 | 03:14 Uhr

Pinneberg | Weet Se, wat B.Y.O. heet, op en Schild an en Huus schreven? In Maroochydore un in Australien allerwegens finnst Restorangs, een schull beter seggen Spieswarksteden, bi de steiht groot to lesen: B. Y. O. Un nu schall een weten, wat dat heet. Is heel eenfach, blots seggt mutt een dat warrn .

B. Y. O. heet: "Bring Your Own". Dormit meent se, bring di wat to drinken sülvst mit, Eten kannst hier kriegen! Ik seh al, woans sik en düütsche Gastweert schüddeln deit; wo de doch an dat Flüssige den mehrsten Verdeenst hett.

Dat Geheemnis is, de doren Spieswarksteden hebbt keen Lizenz för Beer, Wien un Snaps uttoschenken. Man mit Bruus, Tee un Koffi alleen köönt de jemehr Spiesen nich anbeden. Dor kümmt denn keeneen.

Un so schrievt se buten ant Huus B. Y. O. - bring di mit, wat du drinken wullt.Uns Frünnen dor in Maroochydore an de Oostküst von Australien, Bill, Thelma un jemehr Kinner - all Lüüd twüschen föfftig un negentig - güngen elken Freedag to Avend ut na en Fischrestorang in Maloolaba; de harrn dor ok keen Lizenz för Beer un Wien.

So nehm Bill - he weer achtuntachentig un de Öllst von uns - en Pappkonteener in en Plastiktüüt mit dorhen. Dor weern veer Liter Moselwien in. De sett he int Lokaal op de Disch, stell de Pappkist mit den Wien in de Plastikblaas un den Tapphahn an de Dischkant op, un denn weer siene Bar opmaakt. Glöös geev dat von den Weert, un de braadte Fisch un de Pomfritts müss een sik ann Tresen bestellen un denn ok sülvst halen.

Weer jümmers en billiget Vergnögen, in Goorn un ünner Bööm un Lampions to eten un to drinken. Un wenn de Wien-Konteener leddig weer, wurr de wedder mit na Huus nahmen; denn nüms lött dor Schiet un Affall bi anner Lüüd torüch!

Un siet ik dat dor beleevt heff, maak ik mi in unse Restorangs jümmer mien Gedanken: Woveel mutt een hiertolann doch utgeven för dat Beten, wat een to drinken bestellt, un dat köst een denn ok noch mehr, as een dat weert is!

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen