Vun een "Schnaps-Idee", de wat Godes bröch

Nu steiht de 'Dumm Hans' al twintig Jahr op sien fein Placken. Foto: jana bergmann
Nu steiht de "Dumm Hans" al twintig Jahr op sien fein Placken. Foto: jana bergmann

shz.de von
16. September 2010, 07:23 Uhr

Eutin | Uns "Märchenperfesser" Willem Wisser harr Geburtsdag, avers uk de Ehrenbörger vun uns Stadt Eutin Gustav Peters. All beid hebbt sik kennt, hebbt sik schätzt, un de Schoolmeister Peters hett den gröttsten Andeel doran, dat Wisser, de 1843 in Klenzau op de Welt kamen weer, in uns Holsteiner Rebeed nich vergeten is. De Geburtsdag vun de beiden weer de 27. August. Dat Datum liggt al paar Daag trüch, avers dörch een besünneren Vördrag - veer Dag later - kaamt hier noch paar Regen achterto.

An Vörmiddag vun 27. dropen sik Mitgleeder vun Heimatverband - so as in jedeen vergangen Jahr - ünnert Lei vun 1. Vörsitter Dr. Hahn un Harald Breede as 2. Vörsitter un Schoolmeisterin Karin Thode vun de Wilhelm-Wisser-School op n Friedhoff tohoop, üm de beiden besünneren Menschen ut 19. Jahrhunnert to ehren.

Geburtsdagsblomen weern smuck to bekieken, un de Heimatverband harr vun Garnermeister Walter Palm fört Wisser-Graff een Blomen-Schaal lefern laten. De Farven vun Rosen, twee Sorten Chrysanthemen un Heideblomen lüchen üm de Wett rundüm dat Gröön vun Thuja.

An 31. August fünn sik denn Mitgleeder vun Heimatverband tohoop, üm nat Begröten vun 1. Vörsitter Dr. Hahn int Museum to luus tern, wat Harald Breede to den twintigsten Geburtsdag vun "Dumm Hans" künnig maken wull. Männichmal mutten sik doch wunnern, wo gau de Tied löpt!

In August 1988 weert, merrn in Masuren, as dörtein Eutiner (Ehelüüd Breede, Dunker un Harm mit de Damen Dannemann, Lachnit, Leber, Listemann, Martens un Sach, as uk Klaus Vetter) een Vereen gründen döön. Se harrn in de Neegde vunt Thorner Rathuus een Denkmal mit een Fiedler bewunnert, de alle Blicke op sik trock. De Reiselüüd vun de VHS Eutin harrn glieks dat Meen, so een feine Bronze-Figur kunn doch uk in Eutin stahn. Fix haal jedeen 10 Mark ut sien Kniep, un de l30 Mark weer de Grundstock för de Kass vun de "Maatenschap Dumm Hans". Klar weer de Maten, dat blots de "Dumm Hans" ut Willem Wisser sien Märchen an een gode Steed in de Stadt opstellt warrn schull.

De Leser weet, dat in veele Wisser-Märchen de drütte Söhn, de "Dumm Hans" in Wahrheit een plietschen Buurn jung is un jümmers mit een grooten Schatz na Huus kümmt oder de Königsdochter to Fru kriggt. Sien beiden Bröder de sik klook dünken, kregen nix op de Reeg.

Harald Breede, as tweet Vörsitter vun Heimatverband, weer vun den Gründungsdag bit to de Tied, wo de "Maatenschap Dumm Hans" sik wedder oplösen dö, as de 60.000 Mark op n Dutt weern, Schriftföhrer, harr veele Protokolle schreven, mit Vörsitter Ernst Harm un Kassenwart Klaus Vetter an männicheen Döör kloppt, üm Spenden to sammeln.

Breede leet mit sien Lichtbiller-Vördrag Besinnen bi de Tohöörers opkamen, woveel Mööhn de Vörstandsmaten op sik nahmen harrn, üm dat "Weimar des Nordens" mit een mannshoge Märchenfigur rieker to maken. Middewiel stünn fast, dat de Bildhauermeister, Professer Karlheinz Goedtke in Mölln wahnhaft, den Opdrag kriegen schull. Goedtke stamm ut Oberschlesien, harr in Stettin un Breslau studeert un keem na Kriegswirren na Farchau un later Mölln. Mit sien "Till Eulenspiegel" wür he weltwiet bekannt. Woveel Europäer, Asiaten un Touristen ut Amerika em anfaat un strakelt hebbt, is nich tellt worrn, avers uk Goedtkes "Rufer" in Lauenborg, de Schoosterjung in Preetz, as de Plöner "Angler" sünd neben de Eutiner Kunstwarken un annerwegens to priesen. Goedtkes Arbeiden hebbt Utstellungen in Düütschland, Beirut, Damaskus, Nikosia, Aleppo un so wieder wertvuller un denkwürdiger makt.

De Vörstand vun de "Maatenschap Dumm Hans" harr middewiel den Andrag op "Gemeinnützigkeit" bi de Finanzbehörden stellt, dat geev veel to bedenken, Looperee un Schrieveree weer anseggt. Ünnerstützt würn de Herren later vun de Börgervörsteherin Anneli Voigt, de Schirmherrin vun den Vereen wür, vun Irmtraut Dunker un de Herren Dr. Hahn un Klaus Franck. Arbeid weer noog, de Tall vun de Mitgleeder wuss op veerunsösstig.

Bit "Geldsammeln" weer männichmal Koppien vörhannen, avers uk achter "högere Dören" wür sinnt na Hölp. Gott sie Dank, dat jümmers Lüüd dar sünd, de Geldschiens rutrückt, wenn dat üm een gode Saak geiht. Liekers hett een junge Fru vun de BLE dumals den Andrag stellt, dat de Tosaag vun den Eutiner Finanz-Utschuss för een Dumm-Hans-Spende wedder streken warrn schull, wiel de ganze Geschicht üm de Figur een Schnapsidee weer. "Lögenhafti to vertelln" is uk een Schrift vun Wihlem Wisser kann een dar blots to seggn.

Nu steiht de "Dumm Hans", de vun de Eutiner gau un goot annahmen worrn is, al twintig Jahr op sien fein Placken un de Magistrat hett de Steed "Wilhelm Wisser-Platz" nömt. In sien Geburtsdagsred vergeet Harald Breede nich den Dank an alle lütten un grooten Lüüd, de holpen hebbt, vun de Politiker un Sporkassen- un Bank-Lüüd, de all de Spendeer-Büxen antrocken harrn bit hen na de Handwarker. So hett Steenbildhauer-Meister Stumpf den Granitsockel lefert un Juwelier Schönke harr för de Bronzetafel sorgt. All beid hebbt se dat kossenfrie makt. Se hebbt ahnt: Dumm Hans driggt to Heimatleev bi, denn dat Bewusstsien to den Placken vun de egen Wötteln un dat Lebennigblieven vun uns Moderspraak gifft Knööv.

De Saak üm den Dumm Hans in Eutin harr den Märchensammler Wilhelm Wisser bannig höögt. Harr he doch as utwussen Mann un as Mitgleed vun de "Literarische Gesellschaft Eutin" een Vördrag haaln schullt. He wähl dat Thema "Volksmärchen". Man he kreeg een groot Bangen, dat dit Goot verloren gahn kunn, wiel he se vergeten harr. In sien Kinnertied weer he ut n Klenzauer Öllernhuus to sien Grootöllern na Braak kamen. De Besöök weer sachts för een paar Wuchen dacht, avers he bleev so lang in de Oolndeels-Kaat bit he to School in Klenzau müss. In de Schummertied vertelln sien Oma un Tanten em de schönsten Märchen un Geschichten un nu harr he se vergeten.

He güng över Land üm Lüüd to befragen. Föfftein bit twintig Kilometer weer he an een Dag ünnerwegens. Ünnerricht an de hoge School in Eutin geev he in Düütsch, Latiensch un Griechisch, un wenn he dat inrichten kunn, güng he uk al mal nahmeddags to sien Gewährslüüd, dat weern üm un bi 250 Schäpers, Landarbeider, Huus fruuns, Handwarker un Knechn. As Wisser 1909 in Oldenburg/0. in Pangschoon güng, füng sien Mööhn üm plattdüütsche Märchen eers richtig an.

"Wat Grotmoder vertellt" weer vun 1904 an druckt worrn. To de Tied wür noch n Ünnerscheed makt, op dat Geschichten för Kinner or för utwussen Lüüd weern.

De Eutiner sünd sik seker, dat mit Tostann-Kamen vun de "Maatschap Dumm Hans" de för dat Denkmal Dank verdeent uk een Dank bi Wisser ankamen is för sien Wirken un Warken.

zur Startseite

Diskutieren Sie mit.

Leserkommentare anzeigen