Plattdüütsch : Stadtgill weer int Slie-Rebeed - Loff un Dank för Peter Marxsen

Int Jahr 2011 hett Petrus sik bit Trechklütern vunt Weeder meist beten verdaan. So hebbt männich Lüüd sachts meent.

Avatar_shz von
20. Oktober 2011, 11:20 Uhr

Eutin | As avers de Maten vun de Stadtgill Eutin op Fahrt na Ulsnis weern, stünn fast, dat Petrus een Plattdüütschen sien mutt, denn he schick een heel smuck Weeder dal.

De Reiseleiter

De tweet Vörsitter Werner Guderjan verklor as Reiseleiter Tour un Ziel för dissen Dag. So hett dat staatsche Plöner Slott Herzog Joachim Ernst in de Jahrn 1635 bit 1636 buun laten. Vun de preußische Verwaltung wür 1868 een Kadettenanstalt inricht, de bit 1918 Bestand harr. Dat latere Gymnasium wür oplöst, as de Firma Fielmann den Besitt övernehmen dö.

Duur nich lang un de Kaiser-Wilhelm- oder Kiel-Kanal keem in Sicht. Jümmers wedder is dat een besünneres Beleven, wenn dor paar Scheep dörcht Water gliedt.

Dörch dat Rebeed, wat "Dänischer Wohld" nömt ward, föhrn de Eutiner na Eckernförde. De Stadtnaam - so vertell Werner Guderjan - is trüchtoföhrn op een "Ykaernaeburgh" vun de Herren Ekerenvorde. Wi seggt uk dorto Eichhörnchenburg, wat op Platt Kattekerborg heet. Üm 1200 al kreeg Eckernför dat Stadtrecht. De Landschaft vun dor bit na de Slie (Schlei) is Schwansen. An dat südliche Över vun de Slie geev een lütt "Haal-Puus", wiel de Fahr vun güntsiet noch nich trüch weer.

Feines Verhalen

As de Plattdüütschen denn avers översett würn, kunn se den Kaffee al rüken, de int "Missunder Fährhuus" för se kookt worrn weer. Na dit feine Verhalen föhrn de Eutiner blangen de nördliche Slie-Kant na Ulsnis. Hier heet dat Rebeed Angeln. De Vörsitter vun den Fördervereen vunt Dörpmuseum Kius-Ulsnis-Steinfeld, Peter Marxsen, stünn al parat un wies sik nu as "Fremdenföhrer op Platt".

Ulsnis wür as "Vlfsnees" tun eersten Mal nömt 1349. De Naam bedüüd "Nase, Landvörsprung vun Ulf ". De Roop-Naam hett uk mit de Deerten-Beteeknung "Wolf" to doon. Dat herkömmliche Ulsnis is prägt vun de Landwirtschaft. Dat gifft wohrraftig noch 16 Höfe in de Gemeen, so as richtige Buurnsteden, wi man se noch vun fröher her kennt. Blangenbi driggt een Getreidemööhl, verschiedene Handwarksbedrieven, een Bankfiliale, Kroog un Utflugslokal, as uk een Imbiss to de Wirtschaftskraft vun Ort bi. Een tweetes Standbeen vun de Wirtschaft in de Gemeen is de Tourismus.

Siet 1995 is Ulsnis "anerkannter Erholungsort". De Ferienhuus-Siedlungen Ulsnis-Strand un Süderholz hebbt beste Quartiere, tun Deel mit Kiek-Ut op de Slie un vun wo de Ferienlüüd direkt int Water lopen künnt. Twee Havens för Sportbööd künnt nutzt warrn. Dat is natürlich wat för Ferienlüüd. Een Anlegger gifft dat uk. Dor makt de Utflugsscheep ut Sleswig un Kappeln fast. Op den Ulsnisser Friedhof hett een Nobel-Priesdräger sien letzte Rohsteed kregen. De Chemiker Otto Diels, de 1954 in Kiel storben weer, harr so veel Gefallen an Ulsnis funnen, dat he sik dor een Graff steed köfft harr. Een tweete Berühmtheit weer Reinhold Tüxen, de 1899 in de Slie-Gemeen op de Welt kamen weer. He gellt as Pionier des "Wissensschaftszweiges Pflanzensoziologie un Forscher vun internationalem Rang".

"Mann vunt Fach"

Middewiel weern de Plattdüütschen int Dörpmuseum vun Ulsnis ankamen. De Leiter Vörsitter un "Mann vunt Fach" Peter Marxsen hett dor sien tweetes Tohuus. Akkerat sünd hier de Tügen vunt Leven un Arbeitssteden ut fröhe 19. Jahrhunnert un later utstellt. Allns wat mit Bu- un Handwarksarbeiden to doon harr, mit Huus- un Landwirtschaft, mit Fischeree, School un Füürwehr is in een ehemaligen Swienstall - op twee Etaschen - to bestaunen. Een hele Neih- un Sniederwark steed vermiddelt, wodennig fröher arbeid wür. Plättiesen ut 1860 un Waschrüffel ut Glas harr noch nüms vörher sehn. Uk een Mangel vun 1806 un Stickmuster ut Blick, Botterfatt, Melkdracht, Ge höörns vun Reh- un Damwild fünn dat Interesse, jüst so Böker un Biller ut ole Tied. För de Topleger opn Bu hett dat vör mehr as hunnert Jahr een Schuller-Dräägbrett för Muur steen geven. Vun medizinischen Kuffer bit hen nan Aalsteker, vun Füürlamp bit hen na een ole Schrievmaschin, Geschirr un Porzellan, Spinnrööd un een Wullstraat fünn dat Interesse vun de Eutiner.

Wunsch vun Tüxen

Museen gifft seker noog, avers dit in Ulsnis is wat Besünners. Dat Bewahren, de Pleeg un dat Künnigmaken vun de Sammlung is de Wunsch vun Hans Tüxen west. He hett dörch dat Geven vun sien egen Besitt dat Fundament för dat Heimatmuseum leggt.

To de Ge meen Ulsnis höört uk de Slie-Insel "Kieholm". Fröher hett se to Schwansen tellt un denn is se as Insatz bi een Skatspeel int 18. Jahrhunnert in den Besitt vun Angelner Buurn kamen. Bekannt wür dat Eiland uk ünner den Naam "Liebesinsel", wiel sik dor junge Lüüd drapen hebbt, de sik mehr as geern harrn.

Liesen slieker sik de Abend ran, as de Plattdüütschen trüch aars föhrn. All weern tofreden över den feinen Dag.

zur Startseite

Diskutieren Sie mit.

Leserkommentare anzeigen