zur Navigation springen

Stadtgill fier „Op Wiehnacht’n to“ in’t „Café Lichtblick“

vom
Aus der Redaktion des Ostholsteiner Anzeigers

Disse Fier gifft jümmers Höög un Besinnen – Frieholen ward siet veele Johrn de drütte Adventssünndag, wenn de Plattdüütschen tohoop kaamt

Suutje un sinnig kümmt dat Wiehnachtsfest uns in de Mööt. Dat is goot. Blangenbi löppt avers uk de Snack, dat dat Fest jümmers dree Wuchen to fröh kümmt, wiel dat noch ’n Barg to beschicken gifft.

Frieholen ward avers siet veele Johrn de drütte Adventsünndag, wenn de Plattdüütschen tohoop kaamt. Disse Fier „Op Wiehnacht’n to“ gifft jümmers Höög un Besinnen. Dat Denken un Danken geiht trüchaars in Kinnertied: „Weest du noch, wo’t früher weer?“ Mit dat „fröher“ is dat jo so’n Saak. As an 18. Februar 1947 int Eutiner Voss-Huus de Stadtgill gründ wür, weer de latere Ehrenbörger un Schooldirekter Gustav Peters veeruntwintig Johr as 1. Vörsitter de Gillmeister. Wat he för uns Heimot un Spraak daan hett, weet de Minschen, de sik em dankbor verbunnen föhlt. „Op Wienacht’n to“ wür dortotieds fiert in de Jungsschool, Elisabethstraat, de 1952 Middelschool wür un op Andrag vun Direkter Gustav Peters 1956 mit den Naam Wilhelm-Wisser-School krönt wür.

In de Weber-School keem de Gillmaten uk tohoop, üm sik op dat Fest instimmen to laten. Musiklehrer harrn bitieden mit de Kinner Wiehnachtsleder övt, Riemel würn vördragen un uk utwussen Lüüd harrn plattdüütsche Geschichten praat. Allens weer „int Loot“. Männichmol süng uk de Eutiner Männergesangvereen bi de Fier nun sorg för Höög. De Singkreis vun de Stadtgill ünnert Lei vun Fru Gertrud Peters un Ewald Schäfer würn vun Fru Gertrud Hahn op ehr Handharmonika ünnerstützt. So güng dat bit 1970.

1971 geef Gillmeister Peters sien Possen op un Erwin Prieß wür Öllermann, denn Gillmeister wull un kunn he nich sien. De Meistertitel stünn blots G. Peters to. Dat weer sien Meen un he hett as Öllermann söbenundörtig Johrn dat Lei in sien Hannen hatt. Mit em würn de Wiehnachtsfiern lütt beten anners. Dor wür fiert in Hotels, Kröög, Wirtshüser un leet sik dat goot gahn bi Kaffee, Turt or Wiehnachtskoken. So harrn sik to de Wiehnachtsfier an 13.12.1971 in’t Hotel Wittler 125 Gäste anmellt. Negenuntwintig Johr hebbt Ilse Nicolaus un Hubert Boritzka för feine Musik sorgt, womit nu – also tun 13. Mol – siet 2004 Werner Guderjan de Gillmaten fröhlich stimmt.

As Klaus Rohwedder, da na Erwin Prieß fief Johr för de Gill wirkt hett, keen Öllermann mehr sien wull, keem se nich in de Bedrullje, denn Werner Guderjan stünn praat (viellicht weern uk poor Snackfaten togang west?) un övernehm uk dissen Possen. Weer he doch al veer Johrn as 2. Vörsitter in de Gill.

As de Krögerslüüd Antje un Maik Burmeister ehr Döör vun’t „Anmabu“ för alle Tieden tomokt harrn, wo achter ehr Lese- un Klönnomiddage un uk Wiehnachtsfiern afholn würn, stünn för de Gill een Problem an: wo künnt wi tohoop kaam? Bit 2012 kunn se in’t „Haus des Gastes“ bi Ehelüüd Klemm inkehrn, wo’t mit Kiek-ut övern Grooten Eutiner See recht schön weer. Dat is jo nu allns vörbi.

Öllermann Werner Guderjan harr avers een goden Infall un kunn dat Malöör gau afhoken. Nu ward Lese- un Vördrägsnomiddage in’t Café „Lichtblick“ bi Familie Schröder an de Eck vun de Elisabeth-/Albert-Mahlstedt-Straat afholn un de Fier „Op Wiehnacht’n to“ uk. Fru Madlen Schröder harr de Dischen festlich herricht mit Stollen, Pletten un Wiehnachtskoken un wat dor allns so tohöört. Den smucken Dannboom harr se so opstellt, dat he vun alle Sieden bewunnert warrn kunn.

Bi sien Begröten fünn Werner Guderjan blots open Ohrn un erinner uk doran, dat männichmol dree, avers jümmers twee Busse vull Gillmaten na de Wiehnachtsfiern na Bosau, Börnsdörp, Lent, Bliesdörp un Gröms (Grömitz) föhrn dön. Wi weet, dat männicheen Vereen mit disse Sorg to doon hett. Bi dat Geneten vun Kaffee, Tee un Punsch, bi dat Pröven un Vertehrn vun de feinen Koken ünnerheel Öllermann Guderjan as „Musikmeister“ de Gillmaten mit sien Spelen op de lütte Orgel, de as E-Piano sachts bekannt is.

De Swestern Katharina un Luisa Guderjan lesen ehr Riemel „Advent“ un „Froh laat uns nu man singen“, wat denn alle Maten uk geern dön mit „Ihr Kinderlein, kommet“ un „O Tannenbaum“. Annegret Schäfer ut Plön mök een Riemel över „Uns Goos to Wiehnachten“ künnig un Ruth Maack wüss de Gedanken „Bi de Wiehnachtsfier“ neger to bringen. Vör üm un bi veertig Johr weer de Mudder vun de beiden Deerns, Christine Guderjan, al mit ehr Swester un anner Lütte bi de Stadtgill-Fier. Riemel würn opseggt un se wirken uk mol as Engel in witte Kleder, de Fru Paula Runge ut Gardinenstoff neiht harr. So wat schall nich vergeten warrn, un een markt doch, wo gau uns Tied löppt. Mit een poor Soli överraschen Katharina un Luisa de Maten dörch Singen un Spelen op Akkordeon un Gitarre. Dat dorbi „Wiehnacht is nicht wiet“, „Rudolph the Red Nosed Reindeer“, „Schneeflöckchen, Weißröckchen“ or „Kling Glöckchen...“ nich fehlen dörft, versteiht sik. Dat bi so een Fier „Alle Jahre wieder“ un „Vom Himmel hoch, da komm ich her“ geern sungen ward, weet jedereen. Schatzmeisterin Ruth Beusen harr bitieden Noten- un Textböker praat. Karla Weiß lees de Wiehnachtsgeschicht na’t Lukas-Evangelium un Öllermann Guderjan, de mit sien Spelen vun Wiehnachtsmusik de Maten op dat Fest instimmen kunn, harr noch gode Wöör tun Utklang un verdeel de Bläder mit Programm för’t tokaam Johr 2017. As sünst uk wür an Enn musizeert un sungen „O, du fröhliche“ un „Stille Nacht“ un jedeen hett seker dacht: „Dat Wiehnachtsfest is al in Sicht. Ik denk an di, wünsch di een Licht, dat op den Padd di lüchen schall un Freden uk de Minschen all. Ik wünsch di Glück, Tofredenheit un Segen, de vun Heven weiht.“

zur Startseite

von
erstellt am 20.Dez.2016 | 11:06 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen