Plattdeutsch : Dörtig Jahr Holsteener Kost: Stadtgill in Rathjensdörp

Wenn een fragen deit, wat los weer an 14. Februar 1982, mutten sien Bregen in Gang kriegen.

Avatar_shz von
11. März 2011, 12:33 Uhr

Eutin | Harr dar viellicht een Geburtsdag, Kinddööp, wat weer vergeten worrn? Rein gar nix weer vergeten worrn.

Dat Datum steiht fast in de Akten vun de Stadtgill Eutin, wiel se dunn tun eersten Mal bi Familie Lindemann in Rathjensdörp in ehrn "Dörpskrog" inkehren dö. Un wat keem opn Disch?: Dat in Ostholsteen heel belevte Gröönkohl-Eten. Klar, dat kann sik jedereen uk tohuus koken, avers ut de grooten Pütt smeckt son Eten nu mal an besten un in Sellschop uk.

Dat geev uk jümmers noch Tied för Verklarn, Vertellen, Vördrägen. In all de Jahrn weer so de Afloop un een bunte Tombola hett för Högen un Vergnögen sorgt. Darför weer Günter Beusen un sien Fru Ruth tostännig west.

Nu weern de Gillmaten to dat dörtigste Gröönkohl-Fest in "Dörpskrog" tohoop kamen. Öllermann Klaus Rohwedder kunn 89 Maten willkamen heten, de sik viellicht al to huus paar Daag bi de egen Kost trüchhaln harrn, üm Gröönkohl mit de halven Swiensköpp, Kasseler un Wust, de solten Speckkantüffeln oder de in Zucker ümdreihten braden Kantüffeln so rech geneten to künnen.

In Winterstied steiht seker in alle Lannen Gröönkohl-Eten mal opn Disch. Dar kann avers een seggn wat he will, de holsteensche Gröönkohl-Mahltied is de allerbest. Klar, dat sik so wat rüm-snackt. So weern uk dit Jahr wedder Gäst ut Holland un Karlsruhe darbi, de Fründschop na Eutin plegen oder Verwandte in uns Rosenstadt besöken. Dat Eten bi Familie Lindemann mit ehr Hölps-lüüd is wat för Leckertähn, dat de Gäst uk een wiede Fahrt in Koop nehmt. Dat sprickt för den Krog un för de Minschen, de darbinn flietig togang sünd. "Dörtig Jahr Tru mutt belohnt warrn" meen Fru Lindemann un spendeer för jedeen Gillmat een Glas Sekt. As Huusherrin fünn se uk feine Wöör för de Plattdüütschen, de nu tun eersten Mal ahn Günter Beusen inkehrt weern. Ehr tröstlichen Wöör, dat Günter (storben 2010) vun baven tokiekt un sik freit över dat Tohoopkamen sorg för veel Koppnicken.

Een Dichtersmann hett över dis Kost schreven . . . "Gröönkohl mit Speck, jo, dat gifft Knööv, dat mökt di krall un rund, un de dit Eten nich mag, ik glööv, de Minsch is nich gesund . . ." Gesund sien wüllt de Plattdüütschen all, dat is klar un so leten se sik de vitaminrieke Kost heel goot smecken. Dat dar uk een Kööm un Beer tohöörn deit, versteiht sik vun alleen. Denn flutscht dat beter un de Maag ward kettelt.

Nat Eten, wat blots för Högen un Swögen sorgt hett, würn de Lose verdeelt. Uk dörch Spenden sünst aver dörch de Vereens-Kass weer een bunte Tombola vun Ruth Beusen tohoopstellt worrn. Nieten geev dat nich; achter jedeen Los stünn een Gewinn. Bi dat Verdeeln weern de lütten Deerns Dana un Jolina, Franziska un Dorothea, as uk Katharina un Luisa fix op de Padden.

Uk in tokaam Jahr 2012 ward wedder heten: "Wokeen föhrt mit tun Gröönkohl-Eten?" De Dag steiht al fast un dat is de 11. Februar. Allns weer "rund un schier", un Fahrer Andreas Schulz vun de Firma Witt in Sarau bröch de Gillmaten wedder seker na Huus.

zur Startseite

Diskutieren Sie mit.

Leserkommentare anzeigen