Op Platt : Blau steiht för Karpen un Tru

Reinfelder Wappentier: In Sleswig-Holsteen belöppt sik de Karpen-„Aarn“ op dreehunnert Tunnen.
Reinfelder Wappentier: In Sleswig-Holsteen belöppt sik de Karpen-„Aarn“ op dreehunnert Tunnen.

Wenn een an de Stadt Reinfeld denken deit, sünd dree Bookstaven C, K un Z vörrangig.

Avatar_shz von
11. Februar 2011, 12:09 Uhr

Eutin | Dat C steiht för Claudius, den Pasters-Söhn mit Vörnaam Matthias, de 1740 in Reinfeld op de Welt kamen weer un as Dichter ünnert Pseudonym "Asmus" schreven un uk den "Wandsbeker Boten" rutgeven hett. Sien Lyrik ("Der Mond ist aufgegangen") un Prosa höörn dörch slichte Frömmigkeit tot Huusgoot vunt düütsche Volk.

De Bookstaav K steiht för Karpen, dat is klar: Karpen Cyprinus carpio. Reinfeld is de Karpenstadt. Ursprünglich stamm he - de Karp - ut Asien, avers int late Middel öller weer he in ganz Europa de wichtigste Diek-Fisch. He levt geern dar, wot Water beten warmer is, uk mit Sandbodden un swammigen Grund. Dat gifft verschiedene Zuchtformen, so den grooten Schuppenkarpen mit normale Schuppenkleed op hogen Rüüch un mit düütliche tweezippelige Steert-flossen. An de bövelste Lipp sünd veer Baartfadens uttomoken. De Spegelkarpen hett wenige unregelmäßig verdeelte Schuppen un de knapp naakte Ledder-Karpen besitt meist gar keen Schuppen. De Karpen is een Plantenfreter, lüerlütte Bodden-Tiere nimmt he avers uk mal "to Bost". Sien Laichtied is vun Mai bit Juli.

De drütte Bookstaav - dat Z - schickt uns paar Hunnert Jahr trüchaars. Vör akkerat 825 Jahr - dat weer 1186 - rööp de Holsteener Graf Ado1f III. Zisterzienser Mönche ut Loccum na "Reynevelde". Se schulln dat Heilsau-Tal urbar maken un sik dar ansiedeln. De Mönche weern heel flietig un hebbt na strenge Ordensregeln de Trave-Wälder roodt un Fischdieken anleggt. Se hebbt dat Kloster buut un een Rest vun de Klostermuur is vundaag noch to bekieken.

To de Tied dunn schall dat Reinfeller Kloster een vun de rieksten Stiftungen int Holsteen-Land weß hebbn. De Bööd bröchen op de lütte Heilsau un över de Trav alle Waren un Göder na Lübeck. Na de Reformatschoon wür dat Kloster 1582 ophaven un vun dat afbroken Material entstünn een herzogliches Slott. De Holsteen-Plöner Herzog Joachim Ernst hett in de Midd vunt 17. Jahrhunnert dar een Akademie för Ridderslüüd inricht.

As de Plöner Linie utstarven dö, wür 1772 dat Slott afbroken. Reinfelds Stadtwappen wiest noch hüüt över den Fisch un de Ähren den Krummstab vun Klosterabt. So ward uk an de Mönche dacht, de bedreven, avers sik besünners för de Karpentucht insett harrn. De fraamen Männer hebbt in ehr Tied nich ahnen kunnt, dat dörch ehr Arbeit un Mööhn de Wirtschaft in Reinfeld vun Oktober bit Ostern ankurbelt ward, wiel denn Karpen-Saison is.

Na dat Affischen vun den 51 Hektar grooten Herrendiek un de acht wiederen Dieken, wat för alle Inwahner un Gäste een groot Belewnis is, giff dat de "amtliche Karpen-Proov" mit üm un bi hunnert Lüüd. Börgermeister un Börgervörsteher, de Wirte-Ver een un de Präsident vun Dehoga in Kiel, all de wichtigen Gäst kaamt tohoop, üm to pröven.

Dat geiht Jahr för Jahr ümschichtig. Fünn de Karpen-Proov 2009 int "Forsthuus Bolande" statt, wür dat Eten 2010 int Restaurant "Kalkgraben" ser veert. In Harvst 2011 kaamt denn de Karpen, de lefert ward vun Diekpächter Alfred Wenskus, wedder ut de Köök vun de Fachlüüd Guido un Anja Freyer int "Forsthuus Bolande".

Ward he dar nu braadt un kümmt mit Brummelbeer-Schü opn Disch or op polnische Aart trechmakt, wat seker allns goot smecken deit, eet de Stadtgill-Maten den Karpen-blau an lefsten, un denn mit Kantüffeln, de na "Natur" smeckt. Mit hitte Botter, Schlagrohm un den frischen Meerrettich de so scharp weer, dat de Tranen in jedeen Oog stünn, is dat een Eten tun Geneten. De Oberkellner Wolfgang un Andreas, de de Eutiner al 34 Jahr be deent, leten keeneen Gast-Wunsch open.

Wenn nu een weten will, wot angahn kann, so veel Mal na Reinfeld to föhrn, kümmt hier een lütt Verklarn.

Reinfeld, Stadt siet 1926, is wat för Ogen un Seel. Dat kregen de Maten gau fix, de nat Inladen vun Öllermann Erwin Prieß mitfahrt sünd. Schoolmeister Claus Slama - he weer dunn Börgervörsteher - wies uns sien Stadt. Allns weer goot. To een HAAL PUUST wür Kaffee drunken int "Forsthuus Bolande". Dat Datum weer de l5. Oktober 1978.

As Fru A. Klärmann blangenbi meen: "Wi künnt ja mal tun Karpen-Eten herföhrn, greep Organisatschoonsleiter Günter Beusen (storben 2010) den Gedanken op un Traditschoon weer anseggt. Na eenmal Kaffee föhrn de Platt düütschen nu tun 33. Mal tun Karpen-Vertehrn in datsülwige Gasthuus. Veerundörtig Jahr Inkehren bedüüd avers uk Tofredenheit un Tru. Hett dat Kröger-Ehepaar Wolfgang Freyer sik üm dat Wohl vun de Eutiner kümmert, is nu siet paar Jahrn de Söhn Guido mit Ehefru Anja darför tostännig. Dat ward uk tokaam Jahr so sien, denn de Dag is al af-makt: Ji mööt dat weten, de Plattdüütschen fohrt ton Karpen-Eten an 14. Januar 2012!

Wahrraftig is Fisch wat för Leckertähn un de Tall ward nich lütt sien. In Sleswig-Holsteen alleen belöppt sik de Karpen-"Aarn" op dreehunnert Tunnen (300 000 Kilogramm or sösshunnertdusend Pund). Dat is nich minn.

Un wat weer nu mit de Farv? Karpen, blau, is klar. Harrn wi nich as Kinner vertellt kregen, dat root för de Leev steiht, gröön för dat Höpen (hoffen) un blau (blaag) för de Tru? 34 Jahr na Reinfeld föhrn; dat is uk Tru!

Schall noch een Dank an Andreas Schulz vun de Busfirma Witt in Sarau gahn. He hett de Plattdüütschen goot un seker hen un trüchaars föhrt.

zur Startseite

Diskutieren Sie mit.

Leserkommentare anzeigen