Plattdüütsch : Besinnen op Hans Henning Holm: He sorg för Högen

Geiht de Sommerstied sutje un sinnig toenn, gifft dat in de Stadtgill Eutin wedder plattdüütsche Klön- un Vörlesenamiddage bi de Ehelüüd Klemm, An Grooten Eutiner See.

shz.de von
12. Oktober 2011, 11:00 Uhr

Eutin | Dat sünd jümmers heel kommodige Stunnen.

Wiel de Öllermann Klaus Rohwedder mit sien Fru noch in Ferien ünnerwegens weer, heet de tweet Vörsitter Werner Guderjan de Gillmaten willkamen un stüür dörch dat Programm. Dorbinn speel Hans Henning Holm de Hauptrull. He is an 20. November 1908 in Nindörp, Kries Rendsborg op de Welt kamen. In Niemünster hett he de Holsten-School besöcht un na sien Abitur Ang listik un romanische Spraken op de Universität in Kiel studeert. Dorna güng he int Utland as Översetter, Lektor, Redakteur un Schriftsteller. In Kriegstied wür uk he introcken un keem later in amerikanische Gefangenschaft.

As he dorvun wedder free weer, kreeg he een Anstellung bit Hamborger Finanzamt. 1952 wür de NDR sien Arbeidgever. As Baas vun de "Niederdeutsche Abteilung des Norddeutschen Rundfunks" in Hamborg wirk Holm vun 1960 bit 1973. Autor un Leiter vun de Dingsdagsendung "Hör mol beten to" weer Holm uk un schreev Hörspeele un Theaterstücken. Dörch veele Böker, mit de he de plattdüütsche Literatur rieker makt hett, hett he sik sülvst een Denkmal sett. An 25. März 1977 güng Holm sien Leven in Hamborg toenn.

Wat nu Emma Machalitza in ehr herrlich Dithmarscher Platt an Balladen-Dichtung vörles, kunn blots för Smuustergrienen un Vergnögen sorgen.

Hans Henning Holm hett in sien Parodien bewiest, woveel kraftvulle Humor dorbinnen sitt. Dat gell uk för "Lütt Matten" (oder: "Groth Mallör"), wat vun Vörstandsmat Gustav Schütt künnig makt wür.

Lütte Geschichten würn vun Karla Weiß lest. Dorto höör uk de, de bewiest, dat Plattdüütsch een Weltspraak is. Dat is jüst de Naam vun een Book mit "Heitere un besinnliche Vertelln" - schreven vun Hans Henning Holm.

Wo weert doch in de Normandie, wo Fritz un Frieda Möhlmann Urlaub moken dön un bi den Ober in Kroog mit Hölp vun ehr Lexikum dat Eten un Drinken op Franzöösch bestelln un se wohrraftig dat kregen, wat se hebbn wulln? Fritz weer baff! Harr sien Fru de Frömdspraak so goot liehrt? Se keken avers all beid verjaagt, as de Ober noch seggn dö: "Na, denn laten Se sik den Wien un de Eier man goot smecken!" Wodennig wür dat Radels oplöst? De Ober heet Hans Börnsen un weer vun de Stader Geest. As jungen Kriegsgefangenen weer he an een Deern hangen bleven, de he nan Krieg heirod harr. Den Kroog un de lütte Buur steed dorto hett de Vadder vun de Deern de jungen Lüüd överdragen un mit Fran zöösch, Hooch- un Platt düütsch kaamt se de Gast ine Mööt. Un wat sä Frieda dorto?: "Vun den Dag an is mien Tovertruun to dat Plattdüütsche so wat as grenzenlos."

In Holms Geschicht "Ünner een Deek" beschrifft he den Wunsch vun Willem Borchers, de geern Arfensupp na sien Mudders Kock-Aart eten müch. Leider steiht de junge Ehefru mit de Kockeree noch op Kriegs-Foot. Se kann doon, wat se will un höört jümmers den Snack: "Bi mien Mudder smeckt dat beter." As Willem för paar Daag för sien Firma verreisen müss, telefoneer sien Fru Elke mit ehr Swiegermudder, de in Bünzdörp bi Rendsborg leven dö. Klor doch, dat se de junge Fru hölpen wull un keem mit den ganzen Backbeernmoos an, de to een richtige Arfensupp höörn deit:

Schinkenknaken, Speck swarten, Gröönkram vun Suppenkruut un Arfen Marke "Hoffnungsgrün". Mit Vulldamp wür de Supp trechkokt un keem den fein inpackt in Zeitungspapeer int Bett, wo se still vör sik hen bruddeln dö. As Willem mit sien Auto vun de Reis trüchkeem, seet sien Mudder al wedder in Toch na Rendsborg. "Man nich so hiddelig", sä Willem to sien Elke, de em glieks na de Slaapstuuv rinlotsen wull. He harr ehr verkehrt verstahn un an de Arfensupp gor nich miehr dacht. Se slog denn uk de Bettdeek op un meen: "Wenn de Herr sik nu bedeen müch!" Willem wickel den Suppenputt ut dat Papeer un keek op dat Wunnerwark. "Dat rüükt so, as wenn Mudder dat kookt harr", meen he. Mit de Arfensupp stimmt dat nu, avers dat bruukt bit Papeer doch nich de Landeszeitung vun Rendsborg mit dat Datum vun den Dag vörher to sien.

Opfulln weer em dat glieks. Dor harrn doch Mudder un sien Fru ünner een Deek steken un uk versteken. Wat?: Een Putt Arfensupp.

Stadtgill-Maten harrn dörch Hans Henning Holm een fein Namiddag. Wat seggt een geern?: "Handvull Snack, Mundvull Platt, dat is doch wat!"

zur Startseite

Diskutieren Sie mit.

Leserkommentare anzeigen