zur Navigation springen
Nordfriesland Tageblatt

21. Oktober 2017 | 05:16 Uhr

Plattdüütsch hölp hochdüütsche "Azubis"

vom

Bi all Berufe hebbt se immer wedder to doon mit Kunden, Meisters oder Kollegen, de lever Platt schnackt

shz.de von
erstellt am 06.Mai.2013 | 03:59 Uhr

Nordfreesland | "Ik hol di af, sunst verlöppst du di." Schoolmeister Johann Thams will seker gahn. Över 4000 Schölers un över 200 Schoolmeisters kaamen hier in de Berufsschool jede Week.

Dat Buwark bi de Husumer Bohnhof ist oftmols anstückt worrn. Vun de Hauptingang bit na de Computer-Ruum geiht dat dörch vele Gänge: trepp-op un trepp-af. Dor kummst meist ut de Puust. Plattdüütsche Fitness. Hoffentlich finn ik naher alleen ok wedder ruut.

30 Schölerinnen un Schölers maken mit bi de Plattdüütsch-Kursus vun de

13. Johrgang. All sind se nu mitten mang dat Abitur. De Tiet dorna schient noch wiet weg.

Hüüt schall präsenteert warrn, wat se sik utdacht hebbt. Ölven Berufsbiller hebbt se utsöcht. Över Internet schall dat Hülp geven för Jungs un Deerns in Utbildung. All Berufe gifft dat hier in de Region, un bi all Berufe hebbt se immer wedder to doon mit Kunden, Meisters oder Arbeitskolleginnen, de lever Plattdüütsch schnacken möögt.

Dat geiht vun Bäckers över Malers un Muurlüüd bit na de Autoelektrikers. Allns Berufe, de an de Husumer School utbildt warrn. För de enkelten Berufsbiller gifft dat Listen mit Fachvokabeln. Dorto warrn Fotos wiest. Veel Möögt hebbt se sik geven mit Dialoge to Saken, de typischerwies int dägliche Leven passeern könnt. Jede Wort un jede Satz is op Platt to hören.

Bi de Buur sind de Kälver utbüxt. Un de Schaap mööt nödig utwarkt warrn. Bi de Timmerlüüd warrd de Lehrling al mol Klookschieter nöömt. Wer weet al, wat en Schusser is? Un sogor en plattdüütsche Richtspruch is to finnen.

Öllern hebbt hulpen, Omas un Opas. Navers hebbt se inspannt un Lüüd ut de Berufe fraagt. Mit veel Spooß warrd vertellt, wodenni se bi de enkelten Informationen kamen sind. Begeistert vertellen Anna Hamester, Julia Friedrichsen un Lea Clausen vun de Schnack mit en ole Hoorsnieder. De Seepenputt, en egen Raseermess un Pinsel sind hüüt bi de Friseur nich mehr to finnen. Ob denn de Hoorsnieder hüüt noch de Steed is, wor een allns Nieges to weten kriggt - dor gifft dat keen Eenigung. Handy- un Facebookgeneration even.

As dat Schooljohr losgung, weern dat teihn Plattdüütschen vun Huus ut, ölven kunnen Platt schnacken un negen wulln dat richti leern. Ant Enn vun dat Schooljohr könnt se all schnacken. "Dor wiest sik, dat berufliche Utbilden, Gymnasium un Lüüd ut dat Umfeld ganzheitlich tosamenwirken för de Spraak ut de Region." Johann Thams freut sik, dat Kolleeg Wolfgang Biegemann dat ganze Projekt ok för Besökers int Internet sichtbar maken will (http//plattdeutsch.bs-Husum.de). ". . . un Ingwer, wees nich bang, ik bring di naher ok wedder torüch na de Hauptingang."

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen