Hildegard Mechlenburg as tu rau

At skriiwen an at moolin sted Hilde boowen uun. Foto: Wickel
At skriiwen an at moolin sted Hilde boowen uun. Foto: Wickel

shz.de von
27. Mai 2009, 03:59 Uhr

Oomram | "Diar wiar ens en ual wöfke", so het en fresk teel. Diaruun soocht ik, üüs ik Hilde(gard) Mechlenburg fört iarst tooch määt. Ik bewonret hör, auer dat hat uunt pleeghüs faant Ruad Krüs toog, saner det hat det auer en kraankels skul. Diar hiart dach föl tu. Hilde wurd a 14.6.1913 bäären uun det hüs faan hör ualaalern, wat daalang at "Friesen-Cafe" as. An wat nü det restaurant "Martin Preesters Hüs" as, hiard hör ööder ualaalern. A aalern, Leonhard Mechlenburg an Irene, bäären Kruse, wiar a iarst neebelaanjen, wat uun "Westerheide" baud.

A Mechlenburg-föörfaaren san bekäänd an uunsen lidj üüb Oomram, oober di grat nööm "ütj at boowerst sküf" wiar för Hilde ei so wichtag. Hat wiar en fiks an geliard wüf an hed an graten geist. Fiks bi a feeder an mä a pokluad hää hat skrewen, moolet an tiaknet. Hör staken üüb riimen san spoosag of uk tu efterseenken. Hilde küd gud föördreeg, wat hat salew dacht hed. Tun bi spal auer a wil ruus, auer a duas faan hör bruder uun a krich, faan a lung wai faan en postkoord faan Feer an ööder begeebenhaiden faan Oomram an a welt. Faan iarjuaren an daalang. Hör fees häät apskrewen uun en skuul buk. Diartu häät tiaknet, en fein saamlang ast wurden.

Hilde, en wil foomen, hü hat salew beracht, wost al ääder: "Ik wal faant lun!" Oober tu iarst blääw hat uun Neebel an onerracht bit skuul turnin. Do fulagt trii juar üüs hüsdoochter üübt "Gut Bredow" uun a Mark Brandenburg. Baaselidj hed hör mänimen uun hör "palast faan hüs". "At wiar en leewent üüs uun en film, ik küd en romaan diar auer skriiw!" Huuchsteld persuunen faan Hohenzollern bit Bismark hää hat diar uundraapt.

Kraankenpleeg an moolerei wiar a wan sker faant fusag Hilde. Hat liard do üüs saster an werket trii juar uunt kraankenhüs uun Hüsem. Do ging det 1949 turag efter Oomram auer a aalern hör halep brükt. Likwel hää Hilde leeder noch en graten dial faan a welt besen an föl lunen häät käänenliard.

Bliis an amgungelk, wrääken an uk grapag, amsoochtag an beskiasen, frinjelk an fööraal kluuk, so haa ik Hilde belewet. Jü snaaket en ualang öömrang an wost noch so ualang wurden, wiar auert salew för mi en rocht "gulkasche". Hilde küd hör dacht uk rap apsai. Hör soochter ging ei bluat am ualang tidjen, uk wan hat diarför wiar, ual weden uun iaren tu hualen. För Hilde wiar a sjiisk spriak "uu so rik uun ütjdrük - mögelkhaiden" diarauer san hör miast fees uun sjiisk skrewen. En letj bispal: "Sehr wichtig ist ein fröhlich Herz und positiver Sinn, denn damit schaffst du schon sehr viel und das ist ein Gewinn." Hilde as nü mä 96 juar gneedag ütj a welt kimen an hää hör uugen slööden. Föl öömrangen hed föl fermaak mä Hilde, det bütj a miaten wüfhood, hat wiar en fresk juweel.

zur Startseite

Diskutieren Sie mit.

Leserkommentare anzeigen