En Künstler un Levenskünstler

Biber hett de in’e Kopp un ok in’e Hand. Foto: oldsen
Biber hett de in’e Kopp un ok in’e Hand. Foto: oldsen

De ole Husumer Fassadenmaler Willy Raatz is Vörbild vun Arnold Tober - beter bekannt as Biber

Avatar_shz von
24. März 2012, 08:15 Uhr

Nordfreesland | "Dat Bild steiht för Hooge, Langeneß un för all de Halligen an sik. . .", künstler-typisch reageert Biber op de erste Fraag. Avers en Hallig is dat - dat is wiss. Un Möwen flegen dor ok, sitten op Pollers un kieken di an un kieken weg. "Dor wieder na links maal ik noch en Lüchttorm, meist jüst so as de vun Westerhever. Un denn kummt dor noch en grote Schoop. En Krabbenkutter heff ik ok noch op de Plaan. . ." Biber süht allns all vör sik, dat Land, dat Water un all de Farven.

Dat mutt wirken, wenn du ut de Garaasch kummst. Dat mutt wirken, wenn du vun de Straat ut kieken deihst. Un dat mutt fein utsehen, wenn Ella ut ehr Tante-Meier-Fenster kieken deit. Gau geiht gor nix. Allns mutt wassen, sunst süht dat nich ut. Wenn blots dat Wedder mitspeelen dä - jümmers Regen un kolt is dat ok. Dat is keen Spaass vör so’n Kunstmaler.

Ella Theising’s Idee weer dat ween. De Wand vun ehr Opfohrt weer schön witt, avers bös, bös langwielig. So greep se na’t Telefon: "Biber, Du kannst doch so fein malen un schöne Ideen hest Du ok. Kumm doch gau mal vörbi."

Biber heet egentli Arnold Tober. He is 56 Johr un Ella Theising ehr Broder. "Ik bin Osterhusumer Möhlendieker un de Naam Biber hebbt se mi all in de tweete Klass verpasst." Biber kennt meist jeden un meist jedereen kennt Biber. He is en Unikum, meist jümmers fröhlich un hört to dat Husumer Stadtbild.

Biber hett all meist allns maakt in sien Leven - he is en Levenskünstler even. Lange Johrn is he mitreist bi de nordische Band "Godewind" as Roadie. As Roadie weer he för allns tostännig. He buut op, he buut af. He verköfft CD un he weet över allns Bescheed. Un de Nikolaus bi dat Wiehnachtskonzert. . . - de kennt he ok.

Maalt hett he all siet de Schooltied geern. En Platten-CD-Cover för Godewind is dorbi ruutkamen. Un in eenige Husumer Kneipen kannst Biller vun em sehen. För Johrn all hett dat Riesen-Märkenbillers vun em geven. Sien Stratenbillers hungen denn de ganze Wiehnachtstied dwars över de Husumer Norderstraat.

"So’n Bild an’e Muur mutt utsehen, as weer dat en Klacks un malen sowat - ok, wenn dat so nich stimmt", meent Biber. Sien Vörbild is Willy Raatz, de ole Husumer Künstler un Fassadenmaler.

zur Startseite

Diskutieren Sie mit.

Leserkommentare anzeigen