zur Navigation springen
Nordfriesland Tageblatt

20. Oktober 2017 | 05:55 Uhr

Betten sind nich blots ton Schlapen dor

vom

shz.de von
erstellt am 05.Aug.2013 | 03:59 Uhr

Bargum | Dat seet se noch deep in de Knoken vun letzt Johr. As "kranke Schwestern" weern se ünnerwegens ween. To lütte Räder ant Bett harr dat Schuven schwoor maakt. Un tosamenbroken weer dat gode Stück ant Enn denn ok noch. Freche Leeder harrn de Mitstrieders opleggt.

Ditmol schull allns anners warrn bi dat 20. Bargumer Bettenrennen. Vun Ella (19), Ann-Christin (18), Jana (18), Leenke (19), Ivonne (19), Maike (20) un Jessica (17) - de "Baumiezen" - warrd dat niege Bett tosamenbuut. Rode un witte Farv an de Sieden vun dat Bettgestell süht ut as Muurwark. Un en poor Schillers maken kloor, dat ditmol dat "männliche" Handwark op de Arm schall. Düchtig veel Schminke un korte Büx hörn ok dorto.

Vadder mutt de Räder anschweißen, Tante besorgt en ole Krankenbett. Mama kummt mit Perdeanhänger. De Matratz findt sik ok noch irgenwo. Buu-Helme in geel, kareerte Hemden, Drachbänner un en Tollstock warrn sammelt. Ok de Versorgung för ünnerwegens mit Eten, Naschen un Drinken is regelt. Frünn un Lüüd ut de Familien kamen as Schlachtenbummlers.

34 Betten sind dit Johr dorbi. Mindestens söss Lüüd hörn to en Team. Grötte, Matratz un Motorenverbot sind vörgeven. All fief Minuten warrd startet. "Volle Granade, Renade, Renade. . .", gröhlt dat över Ost-Bargum. Un denn geiht dat över Teerstraat, Koppel un Sandweg bit na de Soholmer Au. Dorna wedder torüch na de Festplatz. Is Langeneß grötter as Hooge? Quizfragen sind to lösen un för de Prüfungen is all mol en beten Geschick nödig: Gabel-Stopeln, Kringelbieten, Bungee-Trekken, Waterspele.

Ünnerwegens warrn ok de Konkurrenzbetten bewunnert: dat geiht vun en mobile Maisfeld un wilde Höhner över Papa-Mobil un Boxenluders bit hen na Stefanies Fröhstückladen. De Weg is al ganz schön wiet bi disse Sommerhitten.

Dat Öller vun de Deelnehmers is nich vörschreven. Wenn een sik nich mehr jung noog föhlt, denn is de even Tokieker. So is denn ok half Bargum un rundherum op de Been. Bi Kaffee un Koken un en plattdüütsche Schnack op de Festplatz warrd denn bewunnert, wat de Bargumer Landjugend dit Johr wedder mit veel Leevde organiseert hett.

Na dat Rennen sind de jungen Lüüd denn erstmol bi un verpusten. Hett dat nu klappt? Hebben sik de ach so "männlichen" Handwarker nu op de Arm nahmen föhlt? Bi dat Nagel-Inkloppen mit linke Hand un wackelige Hamer kunn man int Twieveln kamen. Avers Ella verkloort: "Wi warrn hüüt Avend allns nochmol genau dörchdiskuteern mit de Herren Handwarkers bi de Bargumer Fete."

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen