zur Navigation springen

Bai e Frasche Rädj stoont fort jarst tooch en wüset forne

vom

shz.de von
erstellt am 06.Mai.2013 | 03:59 Uhr

Nordfraschlönj | Di 10. april heet Ilse Johanna Christiansen di üülje for moon Erk Hassold oufliised, wat hål san båntje tu huum jungeres widerdüünj wälj. Åål da lasmoote foon e Frasche Rädj, da sü nåmde rädj jeewere, wjarn for har. Ouers jarst hääwes har frååged, weer et ouerhood möölik as, dideere båntje ma har årbe as fri psycholoogin uner iinj hödj tu brängen. For jü 59 iir üülj wüset üt Bräist as klåår, dåt et luke koon, wan huum dåt gödj organisiirt än wan huum stipe fäit. Jü as deerfoon ouertjööged, dåt huum ai bloots am räntnere unti schöljmäistere tånke mötj, wan deer en båntje önjt stjör nai beseet wårde schal. Da hääwe et wälj lachter än diilj jam e tid in, ouers huum schal jüst uk as stjörlasmoot kontakt tu maning ünlike manschne hüülje. Än dåt deet huum, wan huum unerwäis as än made önjt laawen stoont.

Tuläid önj Foortuft as Ilse Johanna Christiansen än jarst ouer Friisk Foriining tu e frasch bewääging kiimen. As Erk Hassold formoon wörd, wörd jü as san stää ferträäser forslüünj än uk wääld, sü köms tu e Frasche Rädj. Dåt as nü fjour iir sunt. Tid nooch, am da manschne än da probleeme kåånen tuliiren. Ilse Johanna Christiansen as öntwasche bai maning frasche meetinge wään. Liird heet Ilse Johanna uk as tweed forwüset foon e sünhäidsütschus önj e krisdäi önj Hüsem. Jü wiitj nü, hü huum mansche ouertjööge än önj e gunge seete koon, uk wan ja jarst goorai wan. Et kamt deeraw önj, dåt huum en müülj heet. "Än ik hääw en müülj", säit Ilse Johanna Christiansen suner twiwel. Jü wal di integratiiwe kurs foon harn forgunger widerfääre.

Ouers et ham büte for e Frasche Rädj wat dänj. Anerd heet ham e poliitisch sid. Ma e nai loonsregiiring san keere aw e scheew kiimen, wat e Frasche Rädj ål lung awt hart läin. Deertu hiirt en rucht profesur önj Flansborj, deerma mör frasch-schölj mäistere ütbilded wårde koone. Dåt stoont uk önj e ferdråch foon da trii partaie, wat e regiiring stale. Nü schal e Frasche Rädj åltens wi deeraw haanewise, deerma deer uk wörklik wat önj e gung kamt. Ilse Johanna Christiansen froit har deer aw, ma da önj schiisende manschne önj Kil tu fer hooneln. "Dan besäk ik uk ooftinger min doochter", lååket jü kliin wüset ma da krilde hääre, dan jü booget önj Kil.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen