zur Navigation springen

HeimatAvend : Ut lütte Lüüd ward grote Plattsnackers

vom
Aus der Redaktion der Landeszeitung

In Breiholt maakt Ernst-Jürgen Frahm nich blots Programm, he un Anna Behrmann öwt ok mit Kinners dat Plattsnacken. Tosamen mit annere Fründe von de ole Spaak makten se nu Programm.

Dat weern rund 200 Breiholter un een paar Butendörpler, de in de „Eiderkrog“ keemen: Ernst-Jürgen Frahm, de penschonerte Dörpsschoolmeister, harr to een plattdüütschen Avend inladt. Frahm see bi sien Begröten: „Unse vertruute Heimatspraak mutt erholn warrn, un dat ward bloots wat, wenn man Plattdüütsch snackt, un dat besünners mit de Kinner vun lütt af an.“

So geiht Frahm all siet een ganze Tiet tosamen mit Anna Behrmann na de Breiholter Kinnergaarn in de fröhere Lehrerwahnung un snackt, riemelt un speelt mit de Lütten op Platt.
Düsse Jungs un Deerns, de nu von Sommer an to School gaht, fungen mit dat groote Programm an. Dorbie kunnst marken: Lehrer blifft Lehrer. As in de School, worr op Platt vun een bit teihn tellt, rekent un Vokabeln anseggt, wenn Anna Behrmann Tüch as Büx, Schoh oder Strümp wiesen dee. Ok de Riemel hörte dorto: „Een twee, dree, veer, fief, söss, söben, unse Katt hett Junge kreegen – een is witt, een is swatt, een süht ut as Nawers Katt.“ Jelle ut Tackelsdörp see dat so schön in Takt op, dat alle Lüüt vergnöögt klatscht hebbt.

Maike Struve, Lisa Klemt un Laura-Sophie Ehlers lees denn ehre Geschichten vun dat Wettlesen in de School vör, un mit Marlies Sierck (geborene Rose) ut Homarschen, Magret Höhling (Werner) ut Lohklindt un Dietrich Sendtko ut Büdelsdörp harr Frahm dree utwussen Breiholter Kinner to’n Lesen vun Vertellen ut dat Book vun Jürgen Greve ranholt. Greve, de in sien Heimatdörp Breiholt siet sien Kinnertiet „Haeker“ nömt ward, seet vergnöögt mang de Lüüd un hör sik sien Stories mit Smustergrienen an.

Wenn in Breiholt sungen ward, is Werner Rönnau mit sien Rietfiedel (Akkordeon) dorbi. So sungen denn alle tosamen dat Leed vun de „Jung mit’n Tüdelband“ un dat Breiholt-Leed. Dat is för veele Johrn vun de domolige Lehrer Lundt dichtet un komponeert worn, as August Peters sien beiden Swestern na Amerika utwannert sünd. August Peters sien Dochter Marlies Rönnau seet ok mang de Gäste.

Mit fidele, lütte Stücken weern de Theaterspeelers Ria Tönsfeldt, André Sievers, Anka Rathjen, Harald Klotzbücher, Niels Frahm un Karen Gehrke mit vun de Partie. Un natürlich weer de Karkenchor mit Benita Kath dorbi. De sung von de „Freesenhoff“, vun „Beern un Appel“ un „Trina kumm mol vör de Döör“.

Endli weern ok de örtlichen Jagdhornbläsers bi een Breiholter Veranstaltung dorbi. Ünner de Leitung von Dr. Angelus Brandt ut Wienböken öwt de Grupp´mit Muskanten ut Breiholt, Jevenstedt un Hamweddel lütte Konzerstücken un Signale för dat jagdliche Brauchtum in. Dat klung heel schön.

Dat schöne Breiholt-Programm weer nich vollstännig, wenn de erste Breiholt-Kalenner nich würdigt worrn weer: Dat Druckwark is mit Biller ut ole Breiholter Tieden, to’n Bispill „Swien Schlachten“, „Vagelscheeten“ un ole Hüüser, utstaffert. Un op elk een Siet is en Döntje vun Jürgen Greve to lesen. 250 Klenner sünd bi „Rendsburg Druck“ herstellt worrn, un üm un bi 40 sünd noch för 13 Euro to köpen bi Jürgen Greve in de Breiholter Lerchenweg (04332/9963806). „Wenn dat mit de Klenners nich reckt, denn ward welke nadruckt“, meent Gerda Greve.

Karte
zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen