zur Navigation springen

Plattdüütsch leevt : Jeedeen kann mitsnacken

vom
Aus der Redaktion der Landeszeitung

Annemarie Jensen much geern mit all de Lüüd snacken, de dat holsteensche Platt op ehre Tung föhren. Denn dat Nedderdüütsche hett veele Farven. De will se geern kenne leern un fastholen.

Ünner de Titel „Plattdüütsch leevt – Gedanken över plattdüütsche Wöör“ heff ik över twee Johr lang jede Week en plattdüütsche Stück schreven in de Zeitungs vun de Schleswig-Holsteinische Zeitungsverlag (shz) in’n nöördlichen Landesdeel Schleswig. Vun Anfang an heff ik mi dorbi mit feine ole Wöör befaat. Bald kemen typische plattdüütsche Snacks dorto. Mitünner heff ik ok utföhrlicher över bestimmte Themen schreven, de mi oder ok de Lesers jüst infullen weren.

Plattdüütsch leevt, solang de Spraak snackt ward. Dörch de Stücken in’e Zeitung bin ik örntlich mit de Lesers in’t Snacken kamen. Mien Schrieverie wurr richtig lebennig dörch dat, wat de Lesers seggt un vörslagen hebbt.

Dat duer nich lang, denn harr ik bi de Zeitung dat Woort „Plattdeutschexpertin“ as Tosatz to mien Naam weg. Dat Woort hett mi gor nich so recht gefullen, denn ik wüll gor keen Expertin sien, de allens beter weet. Ik much veel lever mit anner Plattdüütschfrünnen Gedanken över de plattdüütsche Spraak uttuschen un sodennig immer noch sülvst dorto lehren. Dat funktioneert veel beter, wenn sik all Lüüd truen, wat dorto to seggen. En „Expert“ kann mit sien nääskloke Spröök licht mal de Lüüd um sik rum bang maken.

In’e nöördliche Landesdeel Schleswig hett dat Hen un Her twischen de Lesers un mi wunnerbor funkschoneert. Mi dücht, dor is veel Intressantes över unse Spraak to Papier kamen, eerst in’e Zeitung un achterna ok noch in twee Böker bi de Husumer Verlag. Schreven heff ik bit nu leevst in mien egen plattdüütsche Dialekt ut de Flensburger Eck.

Mitünner heff ik de Stücken aver ok, so gut ik kunn, in holstener Platt överdragen un se na Rendsburg an de Landeszeitung schickt. Dat sall nu so wiedergahn op de Plattdüütschsiet. Geern much ik sodennig noch mehr mit de Lesers ut de Mitt vun’t Land in’t Snacken kamen. Dat maakt eenfach Spaaß. Aver dat kann mi ok düchtig helpen bi de Arbeit an en Projekt vun de Schleswig-Holsteensche Heimatbund. Dorbi geiht dat um de Ünnerscheden twischen de plattdüütsche Dialekte in unse Land.

Mit de verschedene Oorten vun Plattdüütsch in Schleswig-Holsteen heff ik mi al bilütten teihn Johr befaat. Dat is richtig spannend. Aver perfekt bin ik noch lang nich in Holstener Platt. So beed ik ju Lesers um Hülp, letztenns ok, dormit ji dat lesen möögt, wat ik schrieven do: Roop mi an oder schriev en E-Mail. Laat mi weten, wodennig ji bi ju tohuus bestimmte Delen utdrücken doot.

Kontakt: Telefon: 0461/3184707 ; E-Mail:a.jensen@stage-combat.de

zur Startseite

von
erstellt am 30.Aug.2013 | 17:54 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Diskutieren Sie mit.

Leserkommentare anzeigen