zur Navigation springen

Breiholter Geschichten: Theoter op de Kanolfähr

vom
Aus der Redaktion der Landeszeitung

De Nomen vun dat Dörp Breiholt is eng mit den Nord-Ostsee-Kanol verbunn. Nie blots dat Breiholt genau in de Merrn vun de, mit 100 Kilometer, längste vun de Menschen buute Waterstroot der Welt liegt, ok as Arbeitgever hett de Kanol vör uns Dörp jümmer een grote Rull speelt. Schon bi den Buu vun 1887 bet1895 hebbt veele Breiholter sik hier ehr Geld verdeent. Ok in de wiederen Johrn weer de Kaiser-Wilhelm-Kanol, wi he dormols hees, in Breiholt de Hauptarbeitgever. An de Streck as Wiekenwärter (Weichenwärter) oder op de Fähr hebbt se arbeit. Dorbi hebbt siek besünners op de Fähr veele Geschichten to’n Högen afspeelt.

Een müch ik hüüt vertelln. Hans un Werner harrn aster in de söventiger Johrn Nachtschicht op de Kanolfähr. Dor keem kott no merden Nacht een Auto vun de Südsiet (Hamweddel) op de Fähr fohrn. Den Motor weer no gor ni ganz ut, dor leg den Fohrer sien Kopp op Stüer un sleep to. No de Överfohrt weer he ok dörch Kloppen an de Schiev ni wooken to kriegen. Wat nu? Weer de Fohrer viellicht duun?

Hans un Werner mookten de Autodöör open, kunn over keen Alkohol rüken. Dorophin beslooten de beiden den Fohrer erstmool sloopen to loten. In düsse Johrn weer nachts ni so veel Verkehr, so dat dat „Sloopauto“ keen grootes Hindernis weer. As de Fohrer no anderthalv Stünn jümmer no ni wooken weer, keem Stüermann Hans, een Schlitzohr, op een Idee. He fohr mit de Fähr in de Kanolmitt un dreih so, dat dat Auto weller in de Richtung stünn, wo dat herkoom weer. Denn mookten Hans un Werner de Autodöör open un rüttelten un schüttelten den Fohrer so lang bet he in Dutt shoot, ganz verbiestert keek, sik wat in Bort snuddelte un mit quietschende Reifen in de sölve Richtung vun de koom weer, vun de Fähr fohr. Wann he mark hett, dat he weller trüch fohren dee, is ni rutkoom. Dat „Sloopauto“ is in düsse Nacht un ok in de nächste Tiet ni weller op de Breiholter Kanolfähr seen woorn. Op de Fohrer siek wull ’n beeten geniert hett? Ok de beiden Fährlüüdhebbt düsse Geschicht erst veel loder vertellt. Se weer jo ni ganz no de Vörschriften.

Karte
zur Startseite

von
erstellt am 27.Aug.2013 | 12:04 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen