zur Navigation springen

Breiholter Geschichten: Spreen in de Beststuuv

vom
Aus der Redaktion der Landeszeitung

In de dörtiger Johrn leevten in Breiholt de Schipper Krischen un sien Fru Greta. Beide weern heel fliedig. No een poor Johr harrn se sik so veel Geld mit Krischen sein „Tjalk“ op de Ostsee un den Kaiser-Wilhelm-Kanol tosomenschippert, dat se sik een Huus köpen kunn’. Nu fehl to dat ganz groote Glück blots no Kinner. Over dat wull un wull ni klappen. De Hoyer-Boyer funn eenfach ehr Huus ni. Greta weer vertwiefelt un legg ehr ganze Kraft nu op dat Putzen un Reinmooken. Se weer jo al jümmer püük un adrett ween. Over nu överdreev se dat. Krischen woor dat Verholn vun sien Fru wies un kunn ehr vörsnacken, mit em een längere Seereis to mooken. De schull ehr’n beten op annere Gedanken bringen.

Ehr Sorg weer over, wer in ehr Huus mool lüften schull. Dor harr Krischen een Infall. Se schull doch de groote Döör vun den Kacheloven wiet open mooken, denn kunn de Luft zirkuleern.

Begöscht steeg Greta denn an de Breiholter Wiek bi Krischen op Schipp. Dor mook sik de Schipperfru ok glieks dorbi, de Kombüüs vun Grund op to reinofiern. Dat Lüften bi ehr Huus güng ok ganz goot. Avers vun düssen Lufttoog leed sik ok een Swarm Spreen (Stare) antrecken un flatterte dörch den Schosteen un de opene Klappdöör in de Beststuuv. Dor flogen se wild ümher un setten sik denn op de Gardinbreder un Möbelmang.

Dat duers gor nich lang, un door leeg överall Vogelschiet. No goot een Week geev dat de eersten Doden. De Tiern weern verhungert un verdöss. No de Schipstour keem Greta neeschierig no Huus. As se de Huusdöör openschloot, keem ehr al den Gestank in de Mööt. Bi den Blick in ehre Beststuuv weer se meist in Ohnmacht fulln. Se stört vuller Ekel glieks weller rut an de frische Luft. Nu müssen Fachlüüd ut Rendsborg de gesamte Wohnung penibel reinmooken. Dat Malör vun Greta güng wie een Loopfüer dörch Breiholt. Dat schall een grooten Dutt Lüüd geven hemm, de sik doröver smunzelt hebbt. „Dat is den Putzdüvel to recht passiert“, so hörs man jümmer weller. Dat hett lang duert, bet Greta siek in ehr Beststuuv weller to Huus föhlt hett. Op Seereis is se over ni weller gohn.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen