Gränse san ai gödj

baskelönj

E Friisk Foriining beseecht da baske

shz.de von
11. Juli 2018, 18:12 Uhr

Sunt mör as 30 iir kjart en floose foon e Friisk Foriining önj Europa ambai än beseecht oudere manerhäide. Marlene Christiansen, wat e räis organisiirt, hoowet aw win uner e wänge än naie toochte fort äin årbe bai da frasche. Jarling as dåt Baskelönj et müülj foon e räis. Tu e floose hiirt uk di journalist Onno Falkena foon Oomrop Fryslân üt Weestfraschlönj, wat baskisch liird heet än ham gödj önj e regjoon ütkånt. Hi heet mahülpen, dåt program tuhuupetustalen. Dåt wus goorai sü lacht, dan maning baskische foriininge än floose seete jam for e baskisch kultuur än spräke in. Trii miljoone manschne laawe önjt norden foon Spånje önj tra autonoome regjoone än en treedepårt foon ja snååket baskisch.

Begotxu Olaizola begröötet da frasche önj Zarautz, en smuk stäi bai e Golf foon Biskaya. Jü snååkt ouer Spånje bloots önj önjfääringstiikne. Jü än maning oudere baskische aktiiwiste san üntufreese ma e spånsche stoot. Ja wan liiwer for jam seelew weese än tuhuupe ma da baske önj Frånkrik. „Gränse san ai gödj“, säit uk spräkeforscher Alan King foont Euskaltzainda, e akademii for e baskische spräke. Hi heet en latjen baskisch-kurs ma da frasche mååged. Deerbai füng huum uk maning keere ouert Baskelönj tu waasen, tum baispal dåt da baske ouer 90% foont stjörgiilj seelew rädje koone. Nuch for 50 iir häi et baskisch en hiinjen stånd: schöljmäister Olaizola ferteelt, dåt jü as schouler sliik füng, wan jü önjt schölj baskisch snååked heet. Ån däi lääser önjt Laskorian Ikastola, en baskisch schölj önj Tolosa, koon huum siinj, wat ham öntwasche dänj heet. Önjfångd as dåtdeer schölj önj en garage suner böke än stipe, jarling luupe deer mör as 1.000 schoulere. Et schölj as deerbai bloots ån bagstiinj foon dåt hiile spräkeårbe. Hu treese widere fant huum önj Tolosa en baskisch blees än en råådiostatsjoon. Meedie önj e äine spräke – da frasche besäkere wjarn önjdänj foon da fehüülje önjt Baskelönj. Ark toorp heet sin äin baskisch fersoomlingshüs, ark regjoon sin äin parlamänt. Ma Fraschlönj koon huum e lååge foon da baske ai ferglike. Likewälj häin da frasche uler dåt fernaamen, dåt’s e grut manerhäid ninte tu seeden häin. Et wus jüst ouders am, da baske wjarn bili nailik deeraw tu hiiren, hü et önj Fraschlönj ütschucht. Südänji köö et lacht weese, dåt et önj e tukamst nuch mör geläägenhäide jeeft, weer frasche än baske tuhuupekaame.

zur Startseite

Diskutieren Sie mit.

Leserkommentare anzeigen