zur Navigation springen
Holsteinischer Courier

21. Oktober 2017 | 21:54 Uhr

Op Tante Meier wart gerne schmökert

vom
Aus der Redaktion des Holsteinischen Couriers

von
erstellt am 27.Dez.2013 | 00:33 Uhr

Ja, Ja ik weet – giff Lüüd, de hebbt eegenordige Angewohnheeten. Kann’s ’n ganzet Book vun vull schrieven. Man düsse Eegenoort vun de ik hüüt ju vertelln much, is wull een ganz besünneren Splien.

Wi hebbt sogor in uns Familie so’n Fall, kann’s nix gegen maken, mutt de Familie mit leven. Ik snack hüüt vun den Gang op’t Klosett, wo man siene Geschäfte ganz för sik alleen verrichen deiht. Un vör allem: Man hüllt sik op düssen Ort nich lang op, denn de Luft is doch meist na unser Geschäft so verpestet, dat man dor gau wedder rut will. Tominnst geiht mi dat so! Nich ümsünst gifft den Spröök: „In düsse hilligen Hallen, dor wo keen Vagel singt, dor löt de Minsch wat fall’n, wat ganz förchterlich stinkt.“

Man schall dat nich glöven, eenige Lüüd nehmt een Book mit in de hilligen Hallen un lest dor in alle Roh eern Krimscher. Een Familienvadder lest op dat stille Örtchen an jeedeen Morgen dat Blatt. Achteran sett he sik an Kaffeedisch un fröhstückt, lest avers wieter in sien Blatt. Eenes Morgens kümmt vun achtern de Dochter, ritt Vadder dat Blatt ut de Hannen un segg: „Igitt, hett Vadder jüst even op Klo lest!“

Een Kerl vertellte mi mol, he is övern Flohmarkt gahn, üm eenen Notenständer to söken. He hett ok een funnen un as de Fru em frogte, welket Instrument he denn speelt, hett he seggt: „Nee, nee ik bün total unmusikaalsch, ik bruuk dat dore Dings för mien Klosett. Ik will dor miene Böker or Zeddels rup leggn, üm in alle Roh to lesen. So kann ik mi beter op mien Geschäft konzentreeren. Verstahn Se mi?“ He weer nich seker, ob de Fru em verstahn hett, denn se keek tämlich verdattert ut de Wäsche. Avers de Kerl is vergnögt na Huus gahn, hett den Notenständer mit den Courier vun den Dag in sien Klosett opbuut un luurte nu vull Spannung, op siene neegste Sitzung. He weer mit sik un den Notenständer vun Flohmarkt tofreeden. De Welt op sien Klosett weer för em in Ordnung! Fröher lesten wi op Tante Meie“, op wi wulln or nich, denn an de Siet vun dat runde Lock, op dat wi seeten, hung dat Blatt an Nogel an een Band. De Stücken Papeer weern nipp un nau för unsen Achtersen in passend sneden. Jo nich to groot, dat weer Verswennung. Blots de Artikel kunn’s nie nich to Enn lesen, dor fehlte jümmers wat. Kiek un so is bi uns op „ Tante Meier“ unse eegene Fantasie entstahn.

zur Startseite

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen