zur Navigation springen
Holsteinischer Courier

22. August 2017 | 19:07 Uhr

„Dat Krüüz vör Oogen”

vom
Aus der Redaktion des Holsteinischen Couriers

Maakt wi den Fernseher an, denn hebbt wi de förchterlichen Biller vun dat Flugtüchwrack in de französchen Alpen vor Oogen. Un dorto ok de Biller vun de truuernden Lüüd ut Spanien, Frankrieg un Dütschland. Düsse Biller vör Oogen laaten keeneen kold. De röhren uns Hart an un wi truert mit. Gar ni uttomolen woans uns dat gahn wöör, wenn wi Verwandten harrn mang de Opfer. Un bit all de Lüüd ut dat Flugtüch identifizeert sünd, waard wi de Biller noch vör Oogen behalen.

Düssen Sündag is Palmsündag. As de Lüüd hörten, dat Jesus nah Jerusalem kööm, dor reeten se Twiegen vun de Palmbööm un leggten de ob de Straat so dat Jesus dor op langrieden kunn mit sien Esel. Un de Lüüd reepen: “Hosianna! Segen öwer em, de dor kümmt in den Herrn sien Naam, den König vun Israel!” As en König hebbt se em begrött. Un blots en paar Daag later schreegen se: „Ant’t Krüüz mit em!“ Jesus hett dat all wüss, dat dat Krüüz op em tööben dö. All an’n Palmsündag harr Jesus dat Krüüz vör Oogen. Awers ni blots dat: Jesus het all dör dat Krüüz hendör de Blick nah’n Himmel hat.

Vör en paar Weeken is en Frünn vun mi sturm an Krebs. Vun de Diagnose bit to sien Dod wörn dat man blots acht bit neegen Weeken. Gruusig. Bannig tröstlich meern in miene Truer is dat, wat siene Fru schreeben het. In de letzten Daagen vör sienen Dod het he mehrfach vertellt wodull he sik op den Himmel freut. Woans köm he dorto? Mien Frünn het de meerste Tied vun sien Leben Jesus sien Krüüz vör Oogen hat. He wüss: „Jesus het an’t Krüüz miene Schuld betahlt un so för mi de Döör to’n Himmel, to’t Paradies opslaaten.“ Mien Frünn het dat ni blots wüss, he het dat predigt un as de Dod op em toköm, dor het he dat ok beleevt. De Freud op den Himmel wör em real. Dat tröst mi mehr as allens annere. De Apostel Paulus schrifft: För de Lüüd, de verlaren gaht, het dat Wort vun’t Krüüz keenen Sinn. Awers för uns, de wi reddt warrd, is dat Krüüz en Kraft vun Gott. Mit Jesus sien Krüüz vör Oogen kümmt de Kraft vun Gott ok to mi. Un sodenni ritt uns de Dod un de Truer ni den Teppich ünner de Fööt wech. Ok wenn’t weh deit, ok wenn wi huult: Wi blieft stahn op Jesus sien felsenfastet Fundament. Düsse wunnerbare Erfahrung, dat Jesus uns driggt un hölt ok in swarste Tieden, de wünsch ik uns all.

zur Startseite

von
erstellt am 27.Mär.2015 | 14:23 Uhr

Gefällt Ihnen dieser Beitrag? Dann teilen Sie ihn bitte in den sozialen Medien - und folgen uns auch auf Twitter und Facebook:

Kommentare

Leserkommentare anzeigen